WHO: Coronap Kinami tuniluutileqqinnera Europamut sunniuteqangaarnavianngilaq
Kinami coronap maanna tuniluuteqqilernera Europamut annertunerusumik sunniuteqarnavianngitsoq, nunarsuarmi peqqinnissaq pillugu suliniaqatigiiffissuaq WHO nalunaarpoq.
Coronalli allannguutaa nutaaq, XBB 1.5, Europami tuniluutilersimasoq paasineqarmat, WHO Europami peqqinnissaqarfinnut piareersimaqqusivoq.
Europami coronap allannguutaanik taassuminnga nutaamit tunillanneqarsimasut amerliartormata kingunerisinnaasai pillugit nalilersuisoqarpoq.
AAMMA ATUARUK Kinamit angalasut coronavirusimut misissortissimanissaat EU-mi nunat amerlanerussuteqartut kissaatigigaat
Kinami coronamut killilersuutit arlallit atorunnaarsinneqareersullu coronap allannguutaa nutaaq tuniluutilerpoq.
Tamatumalu kingunerisaanik USA-mi Europamilu nunat ilaanni, Kinamit tikittunut tunillanneqarsimannginnermut uppernarsaateqarnissaq piumasaqaatinngortinneqarpoq.
Europami nunat arlallit maanna killilersuillutik iliuuseqarnerat isumatusaarnerusoq, WHO-p immikkoortortaani pisortaq Hans Kluge nutaarsiassaqartitsivik AP-mut oqarpoq.
Killilersuiniarlunili iliuuseqarnerit inunnik assigiinngisitsinnginnissaat ilisimatusarnermillu tunngaveqartariaqarnerat, Hans Klugep kaammattuutigaa.
