Zelenskyj: Kharkivimi sumiiffiit ilaat tigoqqippavut

Ukrainep avannamut kangiani nunap immikkoortua, Kharkiv, Ukrainemiunit tiguneqaqqissimasoq, præsidentip Volodymyr Zelenskyjip ippassaq pingasunngornermi oqaatigaa.

Nutaarsiassaqartitsivik AFP taama allappoq.

Nunalli immikkoortoortuani sumiiffiit tigoqqitatik sorliunersut, præsidentip oqaatiginngilaa.

Ukrainemiut sakkutuui ulluni kingullerni marlussunni iluatitsisimasut ilisimannittunit oqaatigineqarpoq, tamannali oqartussanit suli uppernarsarneqarani.

AAMMA ATUARUK USA-p Rusland peqqarniisaarniartartunik tapersersuisutut naqissuserusunngikkaa

Ukrainep kujasissuani akersuutereernermi illoqarfeeqqat ilaat ukrainimiunit tiguneqaqqissimasut aamma nalunaarutigineqarpoq.

Ruslandip saassussisarnerisa kinguneranik sakkutuujunngitsut toqutaasimasut pillugit pinerliiniatut nunanit killernit naqissuserneqassasoq, Volodymyr Zelenskyjip inassutigaa.

Ruslandip pinerliiniatut naqissuserneqassanersoq, USA-p præsidentia Joe Biden tusagassiortumit ataasinngormat aperineqarami naaggaarpoq.

Ruslandip pinerliiniatut naqissuserneqarnissaanik isuma naleqqutinngitsoq, USA isumaqarpoq.