Aalisartut kattuffii: Inatsisissap kinguaqqinnera pitsaasuuvoq

Naalakkersuisut aalisarnermut inatsisissatut siunnersuutissamik inatsisiliortunut saqqummiunnissaa 2023-p upernarneranut kinguartippaat. Tamanna kattuffiit oqaloqatigineqarnerorusunnerannik ilaatigut peqquterpoq.

Kattuffik aalisartunik ilaasortaqarnerpaaq iluarisimaarinnippoq.

- Isumaqarpunga iluaannartoq. Pissutigalugu ataatsimiititaliarsuup saqqummiussaa qiviaraanni qallunaatuumit kalaallisuumut nutsigaannaavoq, kalaallisuunngortitaanani taamaalilluni atuaruminaattorujorujussuulluni, KNAPK-p siulittaasua, Nikkulaat Jeremiassen oqarpoq.

Taamaammallu kattuffiup nammineerluni sinerissami ataatsimiititsinissani maanna pilersaarusioraa, siulittaasoq aamma oqarpoq.

AAMMA ATUARUK Aalisarnermut inatsisissaq kinguaattooqqittoq

Ataatsimiititaliarsuaq 2019-imi marsip qaammataani isumaliutissiissusiulerpoq. Isumaliutissiissummi sinerissap qanittuani aalisartut ikilinissaat sakkortuumik inassutaavoq. Pisassiissutillu Pinngortitaleriffiup innersuussutaanut malinnissasut innersuussutigaat. Isumaliutissiissut septembarimi naammassivoq.

SQAPK KNAPK-lu tamarmik ilaasortaatitaqarnikuupput. Tassanilu oqaaseqarnissamut periarfissaqarnikuullutik.

SQAPK: Uummanniarlusilu Upernaviliaritsi

Taamaakkaluartoq kattuffiup aappaani, SQAPK-mi pisortap, kinguartitsineq aamma ajunngitsuunerarpaa. Nutaanilli paasissutissanik anngussassaqanngillat.

- Oqaasissarpassuaqanngikkaluarpugut atuakkat avataatigut oqaatigisimanngisatsinnik. Kisianni uani innuttaasut amerlanerusut tikinneqarnissaat pisariaqartutut isikkoqarpoq, Erik Lange oqarpoq.

Naalakkersuisut namminneerlutik ataatsimiititaliarsuup suliaa, Uummannami Upernavimmilu aalisartunut aamma saqqumiuttariaqaraat, pisortaq isumaqarpoq.

- Sinerissap qanittuani qaleralinniaqarfiit annersaat tassa taanna Upernaviup Uummannallu aqutsiveqarfia.

Inatsisartut Aalisarneq pillugu Ataatsimiititaliarsuaq 6 millionit koruuninik sulinissaanut aningaasalernikuaat.