Assammik arsarnermi unamminnginnermi: USA-mut ima ajugaassaagut

Nunatsinnit angutit assammik arsarnermi nunanut allanut unammisartut unnugu nalunaaqutaq qulingiluanut unamminerit annerit ilaanni unammissapput.

Kalaallit amerikap avannaamiuisa caribiamiullu VM-imut anngunniunneranni anngunniutivinnermi USA unammissavaat.

Periarfissaqarluarporlu.

Nunarput ajugaassaguni aappaagu VM-imut aamma anngutissaaq.

Amerikamiunulli nunatsinnut unamminerni siullermi isertitsinernik arfineq-pingasunik siuaqqalluni ajugaasunut ajugaanissaq pisariaqarpoq.

KNR-ip timersornermut ataqatigiissaarisuata, Noah Mølgaardip oqarnera naapertorlugu kalaallit illersuilluarnissaat ajugaanissamut siullertut pisariaqarpoq.

- Unamminermi siullermi assersuineq iluatsilluanngilaq USA-mut unamminerminni, USA-p isertitaat amerlavallaarujussuaramik Kalaallit isertitaasa amerlassusai ajunngikkaluarput, Noah Mølgaard oqarpoq.

Saamillertut qitiussasut

Kalaallit siulersortaata Minik Dahl Høeghip nunatsinneersut sukkasertik peqqusersusaallaqqinnertillu atorluarlugit amerikamiut terlisaassagaat KNR-imut oqaatigaa.

AAMMA ATUARUK Kalaallit assammik arsartartut USA-mut finalilersut

Tamanna Noah Mølgaardip isumaqatigilluinnarpaa.

- Assersuineq iluatsinnerusariaqarpoq taavalu måliniittugut amerlanerusunik annaassisariaqarput. Tamanna pisinnaassappat taava oqilasoortagut, soorlu Minik Dahl Høegh, sukkasuumik saassussinermi aallarsariataarpata amerikkarmiut angumerisinnaanngilaat, Noah Mølgaard oqarpoq.

Ajugaassagunik...

Nunarput unnugu ajugaassaguni nunarsuarmi pissartanngorniunnermut 2007-imi anngukkamili aatsaat annguteqqissaaq, Noah Mølgaardillu tamanna nunatsinni assammik arsarnermi iluarilluinnarneqassasoq qularutiginngilaa.

- Nunatta nunarsuaq tamakkerlugu pissartanngorniuteqataaneratut misigeriikkatsitut nunatsinni assammik arsartarneq 2023-mi januaarimi nuannarineqarluassaaq.

Unnugu unammineq KNR TV-kkut toqqaannartumik nalunaaqutaq qulingiluanit malinnaaffigisinnaavat.