Christina imaanut pissilluni niviarsiaqqamik annaassisoq
Christina Sara Egedep Nuummi Nuutoqqami imaanut pissilluni niviarsiaqqamik 14-inik ukiulimmik, inuunerminik navianartorsiortumik annaassiniarnissaminik aalajangernissaminut sekunderpassuit atunngilai.
Taamaammat taanna nammineq inuunerminik peqqissutsiminillu navianartorsiortitsilluni niviarsiaqqamik annaassiniarnini pissutigalugu Kalaallit Nunaanni Politiinit tallimanngornermi februaarip ulluisa 25-anni nersornaaserneqarpoq.
- Niviarsiaqqap juulimi unnuami annannissaanut immikkuullarilluinnartumik iliuuseqarnissamut nukissaqarnerit pingaaruteqarluinnartuusoq nangaassuteqarnanga qularutiginngilara, politimesteri Bjørn Tegner Bay nersornaammik tunniussinermini oqalugiarluni oqarpoq.
AAMMA ATUARUK Ikiueqqaallammak: Kikkut tamarmik ikiueqqaarsinnaasariaqaraluarput
Christina Sara Egede imaanut nillertumut pissilluni niviarsiaraq Nuutoqqami imaaniittoq nunniukkamukaappaa, tassanilu innuttaasut allat pingasut imaanit qaqitsinissamut piareersimasimasut, Kalaallit Nunaanni Politiit tusagassiuutinut nalunaarummi pisoq pillugu allapput.
- Christina inuup allap inuuneranik annaassinerit inuup iliuuserisinnaasaanik kusanarnerpaallunilu namminissarsiunnginnerpaavoq, politimesterip oqalugiaatini taama naggaserpaa.
