DMI: Kitaani 2018-ip kingornatigut aatsaat taama sikuutigaaq
Mannannguaq Mathæussen paninilu Uiloq Kangaamiuni ulluni 35-ni saperngupput.
Johanne Nielsen Poulsen ernguttanilu Maniitsumiit Atammimmut angerlarlutik umiartuunneqarnissartik qaammatip aappaa’qeeqqani utaqqisimavaat.
Disko Line naapertorlugu ilaasut arfineq marluk Maniitsup eqqaani nikissinnaajunnaaqqapput – ilanngullugulu nioqqutissat nutaat Qeqertarsuup Tunuanut anngussinnaajunnaaqqapput. Tamarmik kitaani sikuuneranik pissuteqalutik.
Ukiorlu manna pissutsit immikkut ipput. DMI-mi sikunik alapernaarsusisartut KNR-imut nalunaarput kitaani 2018-ip kingornatigut aatsaat taama sikuutigisoq.
AAMMA ATUARUK Mannannguaq paninilu Uiloq Kangaamiuni ullut 33-t saperngupput
- Kitaata Kujataani pisarnermit sikuuneruvoq, silasiortoq Jens Jakobsen oqarpoq.
- Februaari marsilu pisarnermiit isseqarnerupput, kitaatalu sikua pisarnerminiit siaruarnerusimalluni.
- Kisianni ukiuni ”nalinginnaasuni” kitaata sikua aamma umiarsuarnik angallannermut akornutaasinnaasarpoq. Pingaartumik Kangaatsiap kujataa’tungaani kitaata sikua sinerissamut tulattarpoq – tassani siku akuttunngitsumik qaleriiaalersarpoq pitaruminaasssilluni. Tassanilu kippasimmik anorlingaartariaqanngilaq sikumit tatisilernermut umiarsuarnut aqqusaaruminaallisumik. Kingullermik 2018-imi taama sikuutigaaq.
Mary Arctica utiinnarpoq
Disko Line kisimi sikumik ajornartorsiunngilaq. Aamma sinersortaat Sarfaq Ittuk taamaappoq. Massakkorpiaq Maniitsumut anngussinnaanngilaq, illoqarfiup avanaa’tungaani siku artoramiuk.
Taamaattumik Aasiannut, Illulissanut aamma Qasigiannguanut nioqqutissanik nutaanik pissaqartitsinissaq ajornakusooqaaq. Sinersortaat Mary Arctica apuussinnaanngilluinnarpoq. Sapaatip akunnera manna Nuummut utiinnartariaqarpoq.
Tikiffissat tulliit tassaapput 4. apriili, 11. apriili, 18. apriili aamma 25. aprilii. Kisianni Royal Arctic Line-p aappalaartumik ilisarnaasissallugit toqqarpaa, isumaqartumik aatsaat siku silallu pissusaa ajunngippata tikittoqarsinnaasoq, sermitsiaq.ag allappoq.
Jens Jakobsen naapertorlugu ukioq manna januaari februaarilu nalinginnaasimanngillat. Tassami ”pisarnermiit amerlanerujussuarnik” Atlantikup Avannaani naqitsinikiffeqarsimavoq.
- Naqitsinikiffiit taakku aamma annertuumik sakkortussuseqarsimapput, taamalu silaannaq nillertoq annertoqisoq Kitaata Kujataanut ingerlatittarsimallugu, sineriak sinerlugu sikuulersitsisumik – immap sikuanik nalinginnaasumit annertunerujussuarmik pilersitsilluni, oqarpoq.
- Pingaartumik Nuup Sisimiullu akornanni februaarimi ukioq manna immap sikua pisarnermit annertunerusoq malugineqarpoq.
Suli sapaatip akunneri marlussuit ingerlassapput
Imaaliallaannarlu siku aqqusaarneqarsinnanngilaq. Tassami issusoorujussuanngorsinnaavoq – sikumimmi pioreersumut ilannguttarami.
Sikut ilaat en meteri tikillugu issussuseqartarput ilaalli taamaallaat 30-50 centimeterinik issussuseqarlutik.
AAMMA ATUARUK Johanne ernuttanilu angerlarniarlutik qaammat ataaseq sinnerlugu utaqqisut
Umiarsuarfigineqalersinnaanera qanoq sivisutigisumik utaqqissavarput?
- Eqqoriarsinnaavara ullut 14 ingerlaneranni taamaalissasoq. Eqqoriaaneq naatsorsueqqissaarnermik tunngaveqarpoq, qularnaveqqusiisinnaanngilangalu. Kisianni sapaatip akunnerta naanerani matumani sila kiatsikkiartorpoq, seqinerlu pissaaneqarnerulerluni Jens Jakobsen oqarpoq.
- Februaari marsilu isseqaaannavissimapput sikoqartitseqalutillu. Royal Arctic Line februaarip aallartinneraniilli Qeqertarsuup Tunuanut umiartorsinnaasimanngilaq, taamaattumik neriuutigaara sapaatip akunneri tullinnguuttut marluk ingerlaneranni ammaneqalissasoq.
