Enok Skade qaqqap qajannartup nutaat eqqaani najugaqarpoq: Maani najugaqaannassaanga
Danmarkimi nunatsinnilu nunap qanoq issusianik misissuisarfiup, GEUS-ip, Uummannap Kangerluani, Kangerluarsummi, Ukkusissanit kilometerinik 29-nik avannarpasitsigisumi, Kigarsimami qaqqaq 1250 meterisut portussusilik sanimullu 750 meterisut takissusilik sisooriaannaasoq paasivaa.
Ilisimatusartut qaqqaq ukiut qulit kingulliit sukkatsikkiartuinnartumik nikikkiartortutut nalilerpaat. Nikikkiartorneralu sukkatsikkiartuinnartussatut ilimagalugu.
Assi: Enok Skade.
Tusagaq Ukkusissarmiumit, aalisartutut sulisartutullu inuussutissarsiortarsimasumit tupaallaatigineqanngilaq.
- Tupaallaatiginngilara. Qaqqaq taanna kigarsimap qaqqaanik taasaratsigu, 67-nik ukiulik, Enok Skade KNR-mut oqarpoq nangipporlu:
- Nakkartillugu ataasiarluguluunniit takunikuunnginnakku.
Nuunnianngitsoq
Ujarassiuut naliliigallarneri naapertorlugit, Kigarsimami qaqqaq tassaarsuartitsilluni nakkaagaluarpat, Ukkusissani nunaqarfik malinnik immamit meterit arfineq marluk qummut portussuseqartunik eqqorneqassagatinneqarpoq.
AAMMA ATUARUK Uummannap sulluani qaqqanik qajannartunik nutaanik paasisaqartoqartoq
Ujarassiuulli taama naliliigaluartut Enok Skade inoqarfimmut allamut aarlerinartorsiorfittut nalilerneqanngitsumut nuunnianngilaq.
- Ukkusissat qimassallugu uanga eqqarsaatigisinnaanngilara. Pinngortitarsuaq manna kusanartoq najugarput isigisarpullu tulluusimaanarpoq, Enok Skade oqarpoq.
Neriuuteqartoq
Qaqqaq nakkaassagaluarpat, tassaarsuit ingerlaffigisinnaasaannut Norgemi ujarassiuut Norges Geotekniske Institutsimeersut naliliineri sukumiisut, maajip naalernerani piariissasut, Naalakkersuisut naatsorsuutigaat.
Enok Skade siunissami ajortoqannginnissaanik neriuppoq.
AAMMA ATUARUK Avannaata Kommuniani borgmesteri: Qaqqaq sisooratarsinnaasoq immikkut eqqumaffigaarput
- Soorunami neriuppunga ajunngitsumik kinguneqassasoq maaniinnerput. Pinngortitarsuaq ataqqillugu pivarput. Qanoq iliornerit artoraangatsigit soorunami sapertarpagut inuinnaagatta, qanoq iliorfigisinnaanngilagut, Enok Skade oqarpq.
2017-imi tassaarsuaqarfiusumut qanittoq
Nunatsinnit, Danmarkimit, Norgemiillu ujarassiuut Karrat Kangerluani qaqqamit sisoortoqarneranit kingunissat pillugit nalunaarusiaq siorna saqqummiuppaat.
Tassaarsuaqarneranut takussutissat nalinginnaasut
Sumiiffinni tamani tassaarsuartoqarneranik aarlerisaarisoqartillugu aarlerisaarinerit ilumoorunneqartassapput. Tassaarsuaq sineriammut apuuppat imaq nalinginnaasumit tininnerujussuussaaq imaluunniit imaq annertoorujussuarmik ulissaaq.
Soorluttaaq taamatut pisoqarnerani qimmit eqqissiveerussinnaasartut. Taamatut aarlerinartumik malussarniaraanni piaartumik sissaq qimanneqartariaqarpoq. Nalinginnaasumik sissamit qummut qatsissumukarlutit ingerlasassaatit. Meterit qullarterfitit tamaasa annassutigisinnaavatit.
Paasissutissarsiffik: Namminersorlutik Oqartussat
Karrat Kangerluani qaqqat qajannartut pingasut nassaarineqarput, taakkulu qaqqamut qajannartumut 2017-imi qarsutsinermik pilersitsisup qanittuaniipput. Karrat Kangerluani qajannartut pingasut Karrat 1, 2, 3-millu taaguuserneqarput. Ajornerpaamik pisoqassaguni Karrat 3 tamarmi ataatsikkut imaanut sisussaaq.
Nalunaarusiamut atatillugu Karrat Kangerluani qaqqamit sisoortoqaratarsinnaanera ullumi imaluunniit ukiut 200-t qaangiuppata pisinnaasoq nalilerneqarpoq. Tamatuma qaqugu pisinnaanera kialuunniit eqqoriarsinnaanngilaa.
kangerluarsummi qaqqat qajannartut pillugu aamma taama naliliisoqarpoq, tamanna aqagu imaluunniit ukiut 200-t qaangiuppata pisinnaavoq. Tamanna ilisimaneqanngilaq.
Kigarsimap qaqqaa Karrat Kangerluanni qaqqamit 2017-mi juunip 17-anni nakkaasumit kilometerinik 45-nik kujasitsigisumiippoq.
