Ikuallattoornermi ajunaartoqarnera Avannaani Siumup kamaatigaa

Nutaarmiuni ikuallattoqarnerani ajunaartoqareersorlu Avannaata Kommuniani Siumut misissuisoqarnissaanik kissaateqarpoq.

Allattoq Marie Kûitse Kristensen, Christine Hyldal

februaarip 24-at 2023 15:57

Nutaarmiuni angut 45-nik ukiulik illup ikuallannerani februaarip qulinganni ajunaarpoq.

Nutaarmiuni qatseruteqaratillu qatserisartoqanngimmat ikuallattoq soriarsinnaanagu isigiinnartariaqarsimavaat.

Taamatut qatserisartoqaranilu qatseruteqannginnera inatsisaatsuliornerusoq ersarilluinnarpoq. Avannaata Kommuniani borgmesterip, Palle Jerimiassenip nassuerutigaa.

Tamanna Avannaata Kommuniani Siumut gruppiani siulittaasup, kommunalbestyrelsimullu ilaasortap, Sakio Fleischerip mamiagaa.

- Suliamut tunngatillugu misissuisoqarnissaa sulissutigissavarput, taanna tusagassiuutinut nalunaarummi allappoq.

Aamma atuaruk Naalakkersuisoq inatsisinik unioqqutitsineq pillugu: Kommunimut kinguneqartitsisoqassanersoq oqaaseqarfigissanngilara

Kommunip inatsisitigut unioqqutitsinerani Nutaarmiuni pisoqarnera taassuma kisimiilluni qisuariarfiginngilaa. nunaqarfillu Nutaarmiutut atsigisoq pineqarpat inatsit naapertorlugu piumasarineqarpoq minnerpaamik qatserummik motoritalimmik innermullu qamitsissutaasinnaasumik peqartinneqassasoq, aammalu qatserisartut ittoqassasut qatserisartullu ikinnerpaamik sisamaassasut, Nutaarmiunili taamaattoqarsimanngilaq.

IKUALLATTOQARNERANI AJUNAARTOQARNERA AAMMA INATSISINIK UNIOQQUTITSINEQ

Angut 45-nik ukiulik Upernaviup avannaani Nutaarmiuni februaarip qulingani ikuallattoqarnerani ajunaarpoq.

Tamatuma kingorna nunaqarfimmi inatsisitigut piumasaqaataasut malillugit qatserinermut atortorissaaruteqaranilu qatserisartoqanngitsoq KNR-ip paasivaa.

Nutaarmiut 60-it missaanni inoqarpoq, nunaqarfillu Nutaarmiutut atsigisoq pineqarpat inatsit naapertorlugu piumasarineqarpoq minnerpaamik qatserummik motoritalimmik innermullu qamitsissutaasinnaasumik peqartinneqassasoq, aammalu qatserisartut ittoqassasut qatserisartullu ikinnerpaamik sisamaassasut, Nutaarmiunili taamaattoqarsimanngilaq.

Tamatuma saniatigut kommunimi annaassiniarnermut upalungaarsimasut qatserisartoqarnissaanik upalungaarsimanermilu atortorissaaruteqarnissaanik minnerpaamik piumasaqaatinik naammassinninnissaq akisussaaffigaat.

Piumasaqaataasullu ataallugit pissutsit ippata kommune pisussaavoq immikkut ittumik qinnuteqartussaalluni. Matumani soorlu atortunut assartuutissaqanngippat imaluunniit nunaqqatigiit agguaqatigiissillugit killeqarpata nunalluunniit isorartussusaa matumani akimmisaarutaalluni pisoqarpat.

Immikkulli qinnuteqartussaatitaaneq Avannaata Kommuniata qinnutigisimanngilaa. Tamatumunngalu Avannaata Kommuniani kommunalbestyrelsit ilisimasimanngimmassuk kommunip nunaqarfiini pingasuni qatserutinik qatserisartunillu amigaateqartoqarnera patsisiginerarneqarpoq. 2021-mi juunip qaammataani Ukkusissani illu ikuallammat inuit pingasut ajunaarput.

Tamatuma kingorna Avannaata Kommuniata upalungaarsimanissamut tunngatillugu akisussaaffigigaa uppernarsarneqarpoq, najukkani tamani akisussaaffigisamini isumaannaallisaanermut atortutigut qulakkeerinnittussaanini.

Allisiguk

Sakio Fleischerip mamiatsanneranut peqqutaanerpaavoq ikuallannerup kingunerisaanik inunnik siullermeerluni aatsaat ajunaartoqanngimmat. Ukkusissani illup 2021-imi ikuallannerani inuit pingasut ajunaarput – taamani ikuallattup qaminnissaanut qatserutinik peqanngitsut aamma paasineqarpoq.

Pisup alianartup kingorna Avannaata Kommuniani upalungaarsimasut neriorsuipput nunaqarfinni illoqarfinnilu qatserutit isumannaarsorneqassasut.

- Siornaak illup nungulluni ikuallannerani qatserutit ajortut paasinerani naatsorsuutigisimagaluarparput piffinni allani misissuineq aallartinneqarsimassasoq, taamaattoqarsimanngitsorli maannamut paasinarsivoq. Tamannalu akuersaarneqarsinnaanngilluinnarpoq, Sakio Fleischer oqarpoq.

- Sooq atortut ajoquteqartut paasereernerani qatserutaasivinnik qatserutinillu allani pisariaqartitsisoqarnersoq suliamik aallartitsisoqanngila? Taamatut aperisariaqarpugut ilumut qulakkeersinnaannginnatsigu nunaqarfinni allani atortutigut ajoquteqanngivissunik peqarnersut, aammalu qatserutaasiviit kiassartut pigineqarnersut.

- Aamma borgmesterip kommunalbestyrelsinut nassuiaalluni 2021-mi pisup kingorna nunaqarfinni allani misissuisoqarnissaanik suliamik aallartitsisoqarsimanersoq saqqummiussaqassasoq.

Aamma atuarukPalle Jeremiassen qatserinermut atortut amigarnerat pillugu: Tamanna ajorluinnarpoq

Nunaqarfinni illoqarfinnilu ikuallattoqartillugu inuit ikuallattumut qamisaanissamut atortoqarnersut misissuisoqarsimannginneraasutut, Palle Jeriamiassenip oqaatigerusunngilaa.

Misissuisoqarnikuusoq, taanna KNR-imut ullumi siusinnerusukkut oqarpoq:

- Ilisimatinneqarnikuuvugut kommunep illoqarfiini nunaqarfiinilu isumannaallisaaneq ajunngitsumik ingerlasoq. Tassalu taannaavoq aallaavigisarput, sapaatip-akunnerata siuliani Nutaarmiuni ikuallattoqarnissaata tungaanut. Paasivarpummi Nutaarmiuni, Naujaani aammalu Qeqertani Qaanaap eqqaani qatserisartoqaranilu qatseruteqarsimanngitsoq, Palle Jerimiassen nassuiaavoq.

Palle Jerimiassenip aamma neriorsuutigaa, upalungaarsimanermut tunngatillugu kommunemi pitsanngorsaasoqassasoq aammalu aallartereernerarlugu.

- Naujaani maanna tallimanik qatserisartoqalerpoq aammalu Nutaarmiuni pingasut. Qatserummik aamma Qeqertarnut assartuisoqassaaq qatserisartoqarnermullu tunngasumik nunaqarfimmi paasititsiniaassalluta.

Taanna aamma oqarpoq, kommune maanna upalungaarsimanissaq pillugu allattorsimasuuteqalersoq, tassa nunaqarfinni illoqarfinnilu upalungaarsimanissaq pillugu allassimasoqalersoq. Taannalu naapertorlugu, upalungaarsimanissamut suliaqartut angalassapput atortullu pissusissaatut atorneqarnersut qulakkiissallugu.

Nutaarsiassami kukkunermik nassaarsimaguit uunga allaffigineqarsinnaavugut.