Silap pissusiata allanngoriartornera suaartaaatigigaat: Orpinnik Narsami naatitsivimmi naajorartoqalissasoq
Silap pissusianik ilisimatusartup, Dirk van Asip nunatsinni orpinnik naatitsinini oqaluttuarigaangamiuk upperineqanngikkajuppoq.
Tamannami eqqortuusinnaava?
- Tassuuna silap pissusia pillugu oqaloqatigiinnermik aallartitsinissamik periarfissatsialaqareerpoq, Dirk van As oqarpoq.
Silap pissusianik ilisimatusartut allat nunatta kujataani Narsami siorna naatitsivilioqatigai.
Tassanilu upernaajunerani orpiaqqat kippaannik naatsiiassanillu issunut ikkussuipput, taamaalillutik naajartorlutik orpinngorsinnaalersinneqarlutik, asimut ukiassariartulernerani nuussorsinnaasaminnik.
AAMMA ATUARUK Soqutigisaqatigiiffiit klimamut nalequssarnermut aningaasaateqarfeqaqquaat
Orpiit naalertortartut poppelit naatitsivimmi aallaqqaammut naatinneqartut, Dirk van As oqarpoq.
- Orpiit Kalaallit Nunaanni pioreersut kisiisa naatippagut. Tamanna oqaatigissallugu pingaaruteqarpoq. Pinngortitaq allanngornianngilarput, ikiorniarippulliuna.
20.000-it sorlanereersut
Orpiilli naatsitsivimmi Dirk van Asip suleqataasalu nunatta kujataani naatitaat taakkua siulliunngillat.
Suliniaqatigiiffiat, Greenland Trees 2014-imiilli orpinnik 20.000-init amerlanerusunik naatitsisimavoq.
Orpinnik naatitserusuppit?
Suliniaqatigiiffik, Greenland Trees nunatta kujataani nammineq kajumissutsiminnik orpinnik naatitserusuttussarsiorput.
Suliniaqatigiiffiup atuarfiit aamma suleqatigisinnaavai.
Nittartagaq greenlandtrees.org aqqutigalugu attaveqartoqarsinnaavoq.
Taakku orpinnik maannamut Islandimit tikisitsisimapput – assartorneratalu saniatigut silap pissusianik ilisimatusartut CO2-mik annikitsumik aniatitsinikinnissaaanik kissaatigisaannut atatillugu ingerlanerliorpoq.
- Taamaammat eqqarsarpugut: Narsami naatitsiviliorta. Narsami inuit ilisimalluarpagut, tamarmillu ikiuerusupput, Dirk van As oqarpoq.
Soorli nunatsinni naatitsisoqassava?
Siullertut, silap pissusiata allanngoriartorneranik ukkatarinnilersitsinissamut tunngassuteqartoq, Dirk van As nassuiaavoq.
Dirk van As på klimaforskningsekspedition på indlandsisen.
Foto: Jason Box
- Silap pissusiata allanngoriartornera inunnut paasitikkusulluinnarparput, iliuuseqanngikkuttami sukkasoorujussuarmik allanngoriartussaaq, tamannalu kingunerluuteqangaatsiassalluni, ilisimatusartoq oqarpoq.
- Maani orpinnik naatitsisoqarsinnaanerinnaani silap pissusiata allanngoriartorneranut takussutissaqarpoq – aamma Kalaallit Nunaanni.
Tigussaasumik iliuuseqarneq
Kalaallilli silap pissusiata allanngoriartornera pillugu qularunnaarsinniarnissaat pisariaqanngitsoq Dirk van As isumaqarpoq.
- Kalaallit pinngortitamut qanittumik inooriaaseqarput, silallu pissusisata allanngoriartornerata sunniutai nunarsuatta avannarpasissorpaata ilaani annertoorujussuupput. Nunarsuarmiittulli allat iliuuseqartariaqartut qularunnaarsinnissaat pitsaassaaq.
Kalaallilli orpiinit Narsami naatitsivimmi naatitsinermi iliuuseqarneq iliuutsit ilagaat.
- Ajornaatsuarannguuvoq, naatsitsinerlu nuannarilluinnarpara. Pinngortitamut utertitsisutut misigisimanarpoq, Dirk van As oqarpoq, nangillunilu:
- Silap pissusianik ukiuni qulikkuutaani marlunni maanna ilisimatusarpunga, allanngoriartornerit sumilu maanna iliuuseqartoqartariaqarneralu erseqqissaatigiuaannarpara. Taamaammat nammineq iliuuseqarnissamut periarfissaqarluni nuanneqaaq.
Kisianni naasorpassuarnik naatitsinikkut kalaallit pinngortitaannut allanngortitsinngilasi?
- Ukiuni kingullerni arlalinni orpinnik tusindilikkaanik naatitsivugut, annertoorujussoorpalussinnaavoq, kisianni tamarmik ataatsimoortikkukkit taakku arsaattarfiup angissusaata assinganik annertussuseqassapput. Annikingaarami pinngoritamut allannguinngilaq, Dirk van As oqarpoq.
