Illoqarfiliartarfissaq nutaaq ukiortaami ammassaaq: Coronamut atatillugu isumaqarpunga assut akisussaassuseqarluta
Ukiortaami unnuap qeqqanut Nuummi illoqarfilliiartarfissaq Garagen ammassaaq.
Taanna ammarneqassaaq naak Nuummi corona sukkaqisumik tunillaassuutileruttortoq.
Ulloq kingulleq Nunatsinni tamani tunillatsissimasut 78-it paasineqarput, taakkunanngalu 73-it Nuummiillutik
AAMMA ATUARUK Nakorsaaneq kajumissaarivoq: Ukiortaarsiorlusi annertuumik festernasi
Ingerlatsivimmi Nilak A/S-imi pisortap, aamma Daddy´s-imik Garagen-imilu piginnittup, 150-inik inoqarsinnaasumi festertitsinissap unitsiinnarnissaanut pissutissaqarsorinngilaa.
- Killilersuutit piumasarineqartut tamaasa malittarissavagut. Soorlu qanimut assiaqutit, sprititernissamut periarfissat kiisalu inuit imminnut qanillinaveersaarnissaat tamaasa malissavagut. Allatut iliorsinnaanngilagut – oqartussaniit kaammatuutigineqartut piumasaqaatigineqartullu malittarissavagut, Larseeraq C. Egede oqarpoq.
Sapaatip akunnerata naaneratut allatut ingerlassaaq
Coronap tuniluunnerata sukkatsikkiartuinnarnera pissutigalugu nakorsaaneq kaammattuinikuuvoq, inuit nalinginnarmik ilagisartakkagut ilagalugit ukiortaarsiussasugut – kiisalu festeqataasut sapinngisamik killilersimaarneqassasut.
Peqqinnissamut Naalakkersuisoq Kirsten L. Fencker (N) aamma taamatut kaammattuivoq.
Taanna pingasunngormat KNR-imut oqarpoq, najugaqatigisat ulluinnarnilu ilagisartakkat illagalugit ukiortaarsiornissaq kaammattuutigalugu.
Taamatulli kaammattuineq Larseeraq C. Egede-p paasisinnaanngilaa:
- Sapaatip akunnerata naanera eqqarsaatigalugu, inuppassuit illoqarfimmi imerniartarfiliakaapput. Ukiutoqqami imerniartarfik ataaseq ammassaaq. Taamaammat tamanna sapaatip akunnerata naaneraniit ajornerussappat paasisinnaanngilara, inuimmi illoqarfiliakaapput kikkullu tamaasa ilassiorlugit, taanna oqarpoq.
Corona tuniluutsinnagu ukiortaarsiorneq
Ukiup ulluini kingullerni coronavirusi sukkaqisumik tuniluuppoq.
Taamaakkaluartorli amerlanerusunik killilersuuteqartoqanngilaq.
Naalakkersuisulli Nakorsaaneqarfiullu imatut kaammatuuteqarnissaq isumaqatigiissutigaat:
- Najugaqatitit inuillu ulluinnarni ilagisartakkatit kisiisa ilagalugit ukiortaarsioritsi.
Tuniluunnerup siammarternaveersaarnissaanut akisussaaffeqanngilasi?
- Akisussaaffilittut iliorpugut, pisortallu killilersuutaat tamaasa malissallutigit. Inuit coronapasseqanngitsut siornatigut itigartittareernikuuagut, tamanna piumasaqaataanngikkaluartoq. Taakkua isaarissami unitsittarnikuuagut. Taamaammat coronamut atatillugu uagut assut akisussaaffilittut iliorluta isumaqarpunga. Suut tamaasa malillugit. Killilersuutit kaammattuutillu malikkutsigit allatut iliorsinnaanngilagut, Larseeraq C. Egede oqarpoq.
Killilersuutit pakatsissutaapput
Coronamulli atatillugu killilersuutit aalaakkaanerusumik sinaakkusersornissaat taassuma maqaasivaa.
Assersuutigalugu tamanut sumi tamani atuuttussanik malittarisassiortoqarsinnaavoq, inuiaqatigiinni tunillaassuunnerup qanoq siammartiginera apeqqutaatillugu, taanna nassuiaavoq.
AAMMA ATUARUK Neriniartarfiutilik coronamut malittarisassat pillugit: Millioninik arlariinnik annaasaqassaagut
- Nammisorlutik inuussutissarsiutilinnut tamanut killilersuutit pakatsissutaapput. Tamanna suaartaatiginikuuarput. Sermitsiamut allakkanik ilanngussinikuuvugut, malissinnaasatsinnik sinaakkusersuinissaq kissaatigisarput pillugu. Taava naluneqartassanngilaq: Maanna imatut pisoqarpoq, okay, taava imatut iliussaagut, taamaalilluta ulluinnarni sulinerput taakkua naapertorlugit piareersarsinnaassavarput, taanna oqarpoq nangillunilu:
- Innuttaasunut nalinginnarnut tamanna atuuppoq. Innuttaasut aamma qaqugu inuunerminnik ingerlatseqqilernissartik paasissallugu pisariaqartippaat. Maannakkut tusagassiuutitigut nalunaaruteqartoqarnissaa utaqqiinnartarparput, piffissarlu sivikitsuaraq atorlugu ulluinnarni sulinissarput allanngortitertariaqartarlutigu.
