Illuatungiliuttut pisassat niuerutaasinnaassanersut isumaqatigiinngissutigaat
Sinerissap qanittuani Qeqertarsuup Tunuani, Uummannami Upernavimmilu qaleralinniarneq ullumikkutut paggannermik ingerlaannassanngitsoq Atassutip siulittaasua isumaqarpoq.
Tamaani umiatsiaaqqat paggallutik ullumi aalisarput, tamassumalu atorunnaarnissaa piffissanngorsorineqarpoq.
- Siunissamut innarleeratarsinnaanera taanna erseqqissumik uagut akisussaaqataalluta tigusiffigerusukkatsigu, taamannak aalajangernikuuvugut taanna taperseeqataaffigerusullugu IOK-nut tunngasoq, Aqqalu Jerimiassen KNR-mut oqarpoq.
AAMMA ATUARUK Naalakkersuisoq aalisartunut: Qanoq pisasseeriaaseqassuunga?
IOK tassaavoq, aalisartut ataasiakkaarlutik niuerutigisinnaasaminnik pisassaqarnerat.
Paggannermi aalisarneq siulliunniunnermik tunngaveqarpoq.
Tassa imaappoq aalisartup aalisarsinnaasani tamarmik ataatsikkut aalisarsinnaavai imaluunniit pisassiissutit nungunnissaannut aalisarsinnaalluni.
Aalisarneq pillugu ataatsimitiitaliarsuaq sumiiffimmi tamaani paggalluni qaleralinniartoqaannassappat, aalisarneq 2026-mi imminut akilersinnaajunnaassasoq, isumaliutissiissummini allappoq.
Demokraatit: Niuertariaqarput
Illuatungiliuttut Atassummik suleqateqartut, Demokraatit, siulittaasuata pisassat niuerutaasinnaanissaat aamma angorusuppaa. Taamaaliornikkut aalisartoq kiffaanngissuseqarnerulluni aalisalissasoq taanna isumaqarpoq.
- Niuffallutik niuffaffik taanna pilersinneqassammat. Tassanilu aalisartunut, pisortanut tamanullu eqaannerusumik ingerlalernissaa qularinnginnatsigu, Jens-Frederik Nielsen KNR-mut oqarpoq.
AAMMA ATUARUK Umiatsiaararsortut pisassanik niuernatik attartortalerusuttut
Pisasseeriaaseq niuernertalik atuutilersinneqassappat, umiatsiaaqqamik aalisartut iluminni pisassaatiminnik niueqatigiissinnaalissapput.
Naleraq: Pisassakittut taarsigassarsisinnaasariaqarput
Illuatungiliuuttut pingajuat, Naleraq sammisaq pillugu illuatungiliuttoqatimitut ersarissumik isummerusunngilaq. Taamaakkaluartoq aalisartut qanorluunniit pisassaatikitsigigaluarpata aningaaserivinnut taarsigassarsisinnaanissaat angorusuppaa.
- Aningaaseriviup ilumoortumik uppernarsartariaqarpaa 3 tonsiinnarmik 10 tonsiinnarmik pisaqartaraluarluniluunniit attartorsinnaanngorneranik kinguneqassasoq IOK-juteqalerneq, Naleqqap politikkikkut oqaaseqartartua, Jens Napaattooq oqarpoq.
Aalisarneq pillugu ataatsimiititaliarsuaq qaleralinniat inuussutigisinnaasaminnik aalisassagunik ukiumut minnerpaamik 33 tonsimik pisaqassasut inerniliivoq. Ullumili aalisartut 80 procentiinit amerlanerit tamanna anguneq ajorpaat.
