Jim Lyngvildip saqqummersitai hunnorujulikkaanit alakkarneqartut

Ilulissani Sermermiuni Jim Lyngvildip eqqumiitsuliai ullumi saqqummersinneqarput.

Tamanna sioqqullugu eqqumiitsuliorneq kulturilu pillugu sapaatini akunnernik arlalinnik oqallittoqangaatsiarnikuuvoq, mattusserusuttoqarnikuuvoq, soraarsitsisoqarnikuullunilu.

AAMMA ATUARUK Soraarsitsisoqarnerata kingorna: Jim Lyngvild Ilulissani katersugaasivimmi saqqummersitsiniarunnaartoq

Jim Lyngvildip saqqummersitsileruttornerata nalaani nuannaaqisoq KNR-imiit oqaloqatigaarput.

- Misigisaq nuannertorujussuuvoq. Inuit 300-t missaanniittut takkukkunarput, inuppassuillu takkuttut tamarmik ajunngitsumik isummerput, eqqumiitsuliortoq ilusilersuisartorlu danskeq oqarpoq.

Eqqumiitsuliai eqqartorneqarsimaqisut, perulluliortitsisut, soraarsitsinermik kinguneqartut, allaallu mattussinissamik siunertalimmik oqallitsitsisimaqisut saqqummersinneri inuttaata nuannaarutigeqaa.

- Piumasara malillugu ullumi angusaqarpunga. Tassa eqqumiitsuliat qitiulluinnarput, perulluliornerunngitsoq.

Jim Lyngvildip suliai qaammatinik pingasunik Ilulissani saqqummersinneqassasut oqaatigaa. Taassuma kingorna Kommuneqarfik Sermersuumi borgmesterimit, Charlotte Ludvigsenimit Nuummi saqqummersitsinissaanut aamma qaaqqusaavoq.

Saqqummersitsinissarli tassunga unissanngilaq:

- Qaqortoq, Tasiilaq Aasiaallu saqqummersitsisinnaanersunga aamma aperinikuupput, Takussavarput. Immaqa piffissami aggersumi Kalaallit Nunaaniingaatsiassaanga, Jim Lyngvild nuannaarluni oqarpoq.

Saqqummersitanut tulluusimaartoq.

Jim Lyngvildip oqarneratut Sermermiuni aaqqissuussinermi ataqatigiissaarisup, Petra Linda Clasenip isertut 300 sinneqartut aamma oqaatigaa.

AAMMA ATUARUK Kulturikkut illorsuaq Jim Lyngvildip assilisaanik saqqummersitsisussanngortoq

Saqqummersinneqartullu nuannarineqaqisut taassuma oqaatigaa.

 - Kusagisorujussuuaat. Kusaginnittorujussuupput taavalu inuit nuannisartorujussuupput nersualaarinnillutik kusaginnillutik.

Jim Lyngvildip saqqummersitsinini siulleq Sermermiuniitimmagu taassuma aamma nammineerluni nuannaarutigeqaa.

- Tulluusimaarnartorujussuuvoq, taama oqallisaatigisunik Sermermiuni kulturip illorsuani siullerpaamik saqqummersitsisinnaammat Jimmi, sulianik taama annertutigisunik, Petra Linda Clasen KNR-imut oqarpoq.

- Taavalu assilineri kalaallinik inuttaqarnera taanna tulluusimaarnartorujussuuvoq. Kusanartorujussuupput.