Karla Jessen Williamson Canadami savilersorneq pillugu: Annilaarnarpoq amiilaarnaqaarlu
Canadami nunap immikkoortuani Saskatchewanimi nunaqarfiit ilaanni ippassaq sapaammi unnuakkut savilersortoqarnerani inuit qulit toqutaasut allallu 18-it ikiligaapput.
James Smith Cree Nation nunaqarfiuvoq Canadami nunap inoqqaavineersunik 3400-nik innuttaasoqartoq.
Savilersortoqarnera Canadap oqaluttuarisaanerani piffimmi nutaajunerusumi aatsaat taama sakkortutigivoq. Pinerliffigineqartut ilaat taamungaannaq saassunneqarsimasut pinerluuteqartulli aalajangersimasunik aamma saassussisimasut politiit oqaatigaat.
Kalaaleq ilisimatooq Karla Jessen Williamson Saskatchewanimilu najugaqarpoq. Taassuma najugaqarfigisaa pinerluffigineqartumit akunnernik marlunnik ungasitigisumiippoq.
- Uatsinninngaanniit akunnerit marluinnaat atorlugit biilerluni tikinneqarsinnaavoq, taamatullu pisoqarnera assut alianarpoq eqqarsariarnaqalunilu, Karla Jessen Williamson oqaluttuarpoq, nangipporlu:
- Soorunami amiilaarnarpoq tupaallannarpoq aammalu assorujorujussuaq kikkulluunniit attortissimasut misiginneqataanaqaat, Karla Jessen Williamson KNR-mut oqarpoq.
Assingusumik nalaataqarnikuusimanngitsoq
Karla Jessen Williamson kalaaliuvoq ilisimamatuutut ilisimaneqartoq Canadamilu Saskatchewanimi 1978-mili najugaqalersimalluni.
- Immaqa aamma oqaluttuarisaanermi aatsaat taamak sakkortutigisumik pisoqarpoq, maaniinninni taama assingusunik pisoqarneranik eqqaamasaqanngilanga, Karla Jessen Williamson oqarpoq.
AAMMA ATUARUK Canadami inuit qulit savilersortoqarnerani toqutaasut
Canadami politiit sapaatiummat savilersortutut pasineqartup aappaa toqungasoq nassaaraat.
Pasineqartup timaani ersarissunik ikeqarpoq, politiillu angut imminut ikilersimasorinngilaat. Taassuma timaa James Smith Cree Nationimi nassaarineqarpoq.
Pasineqartup aappaa suli tigusarineqanngitsoq
Politiit pasineqartut marluk qatanngutigiinnerat uppernarsarpaat. Pasineqartullu 30-nik 31-nillu ukioqarput.
Pasineqartup aappaa suli tigusarineqanngitsoq politiit paasissutissiipput, pasineqartorlu illoqarfimmi Reginamiissangatippaat.
Angut ikilersimasinnaasoq politiit “ilimagilluinnarpaat”.
Pineqartup “pillagaasimanermut allagartaani allassimasorpassuullutillu annertusut”, politiit paasissutissiipput.
- Pasineqartup ulorianartuullunilu sakkulisartuunissaa qularutissaqartinngilarput. Attaviginasiuk, Saskatchewanimi politiit pisortaat, Rhonda Blackmore oqarpoq.
Canadamiut politiivisa angutit inunnut attaveqarniarpata mianersoqqussutigigaat Karla Jessen Williamson oqaluttuarpoq politiit mobiililinnut tamanut smsikkut allapput, angutit angerlarsimaffinnut isertinneqassanngitsut aammalu biiliiisa qanoq ittuuneri ilisimatitsissutigaat.
