Kommunip pisortaanera akiliunneqarluni angalanerit isornartorsiorneqarnerat pillugu: Ilungersunartuusorinngilara
Inatsisartut Ombudsmandiata Kommuneqarfik Sermersuup qullersaqarfimmi sulisuminut akilussilluni angalatitsisarnera isornartorsiorpaa.
Sulisut katillugit arfinillit pisortaaneq, Ole Jakobsen ilanngullugu pineqarput.
Kommunip oqarnera naapertorlugu Ole Jakobsen suleqataalu atorfininnerminni isumaqatigiissutaat naapertorlugit taakku inoqutitillu tassa meeraat 18-it inorlugit ukiullit ilanngullugit ukiumoortumik akiliunneqarlutik angalasinnaatitaapput.
- Qullersaqarfimmi sulisut isumaqatigiissutaani periuserineqarsimasumi allassimavoq sulisoq taassumalu ilaqutai ukiumoortumik akiliunneqarlutik angalasinnaasut, Ole Jakobsen oqaproq.
Ombudsmandilli apeqquteqarnerata kingunerisaanik kommunip qullersaqarfimminniittunut ukiumoortumik akiliussilluni angalatitsisinnaanani paasivaa.
Tamanna pillugu kommuni qullersaqarfimmi sulisunut taakkulu inoqutigisaannut meeraannullu sulinngiffeqarneranni akiussilluni angalatitsisarnera unioqqutitsineruvoq.
Ombudsmandip tamanna “isornartorujussuunerarpaa”.
Ilungersunanngitsoq
- Ilungersunartuusorinngilara. Soorunami isumaqatigiissutit malissavagut. Tamanna qularutissaanngilaq, tamanna paasigatsigu ombudsmandimut aamma nalunaarutigaara, Ole Jakobsen oqarpoq.
Taava inuit arfinillit qullersaqarfimmiittut inoqutigisaasa meeraasalu 18-iliineqanngitsut ukiumoortumik akiliunneqarlutik angalasinnaatitaanera ilungersunartuusorinngilat?
- Ilungersunartutut oqaatigisinnaanngilara. Isumaqatigiissununa malinneqarsimanngitsoq. Isumaqatigiissummimi paragrafferpassuupput, allattoqarfiullu isumaqatigiissummik paatsoorneratigut kukkusoqarsinnaajuaannarpoq.
AAMMA ATUARUK Isornartorsiuineq: Kommunimi qullersaqarfimmi sulisut akiliunneqarlutik feeriartarsimapput
Kina kukkusimanersoq Ole Jakobsenip akisinnaannginnerarpaa, kisianni Kommuneqarfik Sermersuumi innuttaasut taama pisoqarsinnaanera eqqarsarnartoqartippassuk tamanna paasisinnaavaa.
- Isumaqatigiissutit soorunami malissavagut, kisianni isumaqatigiissutini akissaatitigut inissisimaffik aamma kukkussutigineqarsinnaavoq, kukkusoqartuaannarsinnaavoq. Kukkusoqarsimasoq paasivarput. Imaanngilaq qullersaqarfik imminut tunisimasoq. Isumaqatigiissut taanna sulisoqarnermut immikkoortortaqarfimmit naammassineqarnikuuvoq, tassanilu ukiumoortumik akiliussilluni angalasinnaatitsinermik periuseq ilaatinneqarluni, pisortaaneq nassuiaavoq.
Tamanna kommunimut qanoq sunniuteqassava?
- Sunniuteqassanngilaq. Eqqortuunngitsoq paasigatsigu iliuuseqarfigaarput, pisortaaneq oqarpqoq.
Kommunip sulisunut isumaqatigiissut malillugu akiliunneqarluni angalasinnaatitaanngitsunut atuutitsinera kommunip eqqartuussissuserisuata innersuussinera malillugu 2022-mi oktobarimi unitsippaa.
