Maalaaruteqarnermut taarsiissuteqarnermullu inatsit nutaaq utaqqisaasoq: Danmark utaqqisaavoq
Peqqinnissakkut sullinneqarnermik maalaarutit pillugit nalunaarusiaq 2017-imit 2021-moortoq qaammatip siuliani saqqummerpoq.
Peqqinnissamut tunngasunik piffissami tasssani maalaarutit katillutik 256-iupput.
Suliat 167-it aalajangiiffigineqarput, tallimararterutaannallu nunatta nakorsaaneqarfianit isornartorsiorneqartut, nalunaarusiami allassimavoq.
- Isornartorsiuinerit taama ikitsiginerat amerlasuunit tupigusuutigineqassasoraara, malittarisassammi aatsaat unioqqutinneqaraangata isornartorsiuisoqartarpoq, Louise Faber oqarpoq.
Taanna Nakorsaaneqarfimmi peqqinnissamut tunngasunut siunnersortaavoq.
- Maalaarut pillugu isornartorsiuisoqanngippat imaanngilaq kukkusoqarsimanngitsoq. Kukkusoqangaarsimasinnaavoq, pisullu amerlasuut naapertuutinngitsumik suliarineqarsimasinnaapput, isorinnittoqassappalli pisoqavissorsimasariaqarpoq.
Ineriartornera uani takuuk:
-
2022 jan-sep: Maalaarutit 157-it
-
2021: Maalaarutit 121-t
-
2020: Maalaarutit 119-it
-
2019: Maalaarutit 121-t
-
2018: Maalaarutit 94-it
-
2017: Maalaarutit 86-it
Inatsit maannakkutut itsillugu sulisoq aalajangersimasoq suliami kisimiilluni kukkusimappat maalaarut aatsaat akuerineqartarpoq. Tassa passussinerup ingerlarnga ataatsimut isigalugu amigaateqarsimappat pitsaanngissimappalluunniit maalaarutigineqarsinnaanngilaq.
Maalaaruteqarnissamummi taarsiivigineqarnissamullu inatsisip nutaap tamanna allanngortissavaa. Peqqinnissaqarfimmilli sullinnerlunneqarsimasutut misigisimasunut maalaaruminarnerulerlunilu taarsiivigineqarnissamik qinnuteqaruminarnerulernissaa, inatsisip nutaap aqqutissiuutissavaa.
Inatsit ukioq manna akuerineqareertussaagaluartoq
Maalaaruteqarnissamut taarsiivigineqarnissamullu inatsit nutaaq 2021-mi ukiakkut ataatsimiinnermi siullermeerneqarmat, politikkikkut siammasissumik isumaqatigiittoqarpoq.
Inatsisissap ukioq manna upernaakkut ataatsimiinnermi akuersissutigineqarnissaa siunniunneqaraluarpoq, aningaasallu 7 millionit koruunit taarsiivigitittussanut atugassatut aningaasanut inatsimmi immikkoortinneqarlutik.
AAMMA ATUARUK Peqqinnissaqarfik pillugu maalaarutit: Ukiut tallimat ingerlaneranni marloriaatinngortut
Maannali 2022-p affaata aappaani suli susoqanngilaq.
Tamanna Naalakkersuisut siunnersuummik tunuartitsinerannik pissuteqarpoq.
Taamaaliornermilu una pissutaavoq:
-… Inatsisissap kingornatigut allanngortinneqartariaqarnani Inatsisartunit suliarineqassappat, siunnersuutip tunuartikkallarnissaa naleqqunnerutillugu, peqqissutsimut taamani naalakkersuisuusoq, Kirsten L. Fencker, allakkatigut apeqqquteqaammut ukioq manna marsimi akissummini oqarpoq.
Unittuunngitsoq
Suliaqarnerli unitsinneqanngilaq. Peqqissutsimut naalakkersuisoqarfimmi inatsisilerituuneq, Martin Pedersen oqarpoq.
Suliassaq maanna Danmarkimiippoq.
- Inatsisissatut siunnersuutip nunatsinni akuersissuutigineqannginnerani Danmarkimi inatsit naleqqussarneqassanersoq paasiniarneqaqqaaassaaq. Tassalu Danmarkimi sulineq ilaatigut apeqqutaalluni inatsit nunatsinni atuutilersinneqassanersoq paasinarsiumaarpoq, Martin Pedersen KNR-imut oqarpoq.
Inatsisissatut siunnersuut aappaagu 2023-mi upernaakkut ataatsimiinnissamut piareersimassanersoq, peqqissutsimut naalakkersuisoqarfimmi inatsisilerituunerup Martin Pedersenip oqaatigisinnaanngilaa, piaarnerpaamilli suliarineqarnissaa sulissutigigitsik oqaatigaa.
