Missisuineq nutaaq: Kalaallit taqqanik milittoorsinnaasut amerlapput
Kalaallinik 400-nik misissuinerup takutippaa kalaallit amerlasuut aammikkut kolesteruleqarpallaartartut.
Aakkut kolesterulimik akoqarpallaarneq pingaartumik naggueqatigiinni Inunni kingornuttagaavoq.
Kalaallit nunanut killerneersunut allanut sanilliullutik uummamminni qaratsaminnilu taqqanik milittoornissamut aarlerinartorsiornerupput.
AAMMA ATUARUK Nunatsinni sukkorneq pillugu sullissivileqalernissaanut 382 millionit koruuninik aningaasaliisoqartoq
Nunatsinni Steno Diabetes Centerimi nakorsaaneq professorilu Marit Eika Jøgensen oqarpoq, paasisat tamakkua nutaat ilaqutigalugit peqqinnissaqarfik kikkut kingornuttakkamik aammikkut kolesteruleqarpallaarnerannik nakkutilliinerusinnaalersoq.
- Inuit pujortartartut, aammikkut naqitsineqarpallaartut utoqqasaanerusullu taqqamikkut milittoorsinnaasutut nalinginnaasumik ilimagisarpagut. Kisiannili uani paasivarput kalaallit pingajorarterutingajaat kingornuttakamik aammikkut kolesterulimik akoqarpallaalernissamut aarlerinartorsiortuusut, Marit Eika Jørgensen oqarpoq.
Taamaammat peqqissaqarfimmiut siunissami nakorsianik aamminni kolesteruleqarpallaartunik paasisaqaraangamik, nakorsiartup qitornaasa qatanngutaasalu kingornuttagaasumik aamminni kolesterulimik akoqarpallaarsinnaanerat aamma eqqumaffigisassavaat.
Inuit nalaatsorinnakkut eqqugaapput
Inuit aamminni kolesteruleqarpallaartarnerat tamatumalu kingornuttagaasarnera sumik peqquteqarnersoq paasissallugu pissusissamisoorpoq. Issittumi silaannaq nillertoq imaluunniit nerisat orsoqarluartartut pissutaappat?
Marit Eika Jørgensenili allamik isumaqarpoq:
- Nalaatsornerinnarmik kingornuttagaalersimassangatipparput. Aammi kolesteruleqarpallaalersarneq qanga inuiaqatigiinni malunnarpallaarsimanngilaq, taamanimi inuit utoqqalerujussuartanngillat.
Aammi kolesteruleqarpallaalersarnermik kingornussisarneq Europamiuni aamma atugaavoq, annikinnerusumilli.
Peqqinnissaqarfimmut artukkiinavianngilaq
Peqqinnissaqarfik nakorsianik aamminni kolesteruleqarpallaartunik katsorsaanissamut piareersimalluarami artukkerneqarnavianngitsoq, Marit Eika Jørgensen erseqqissaavoq:
- Aammi kolesteruleqassutsimik misissuisarnerit katsorsaanerillu akisorujussuanngillat.
Kisianni kolesteruleqarpallaartarneq eqqumaffiginerulerutsigu taqqakkut milittoorneq eqqugaasumut peqqinnissaqarfimmullu pitsaavallaanngitsoq pinaveersimatissinnaavarput, iliuuseqajaarnerlu siunissaq ungasinnerusoq eqqarsaatigalugu imminut akilersinnaaneruvoq.
AAMMA ATUARUK Ilisimatusarneq nutaaq: Nunatsinni uummallunneq misissorneqalerpoq
- Kolesterulimik LDL-mik aammi akoqarpallaalersimagaanni peqqinnarnerusunik nerisaqarnissaq timersornerunerlu soorunami iluaqutaasarput. Tamakkualu saniatigut kingornuttakkamik aamminni kolesteruleqarpallaartut nakorsaaserneqartarput, iluaqutaalluartunik kingunerluuteqarpallaartanngitsunillu, Marit Eika Jørgensen oqarpoq.
Aammi kolesteruleqarpallaartarnermik suleqatigiillutik msissuisuupput nunatsinni Danmarkimilu Steno Diabetes Centerit, Københavns Universiteti Syddansk Universitetilu.
