Mittarfiliortussamik kiisami isumaqatigiissuteqartoqarpoq
Qaqortumi kiisami mittarfiliortussamik isumaqatigiissuteqartoqarpoq.
Kalaallit Airports marloriarluni iluatsinngitsumik suliariumannittussarsiuussereerluni nutaamik aningaasartaqarnersumik missinersuuteqarluni isumaqatigiinniaqqippoq.
Qaqortumilu mittarfiliortussamik maanna isumaqatigiissuteqarpoq.
Qaqortup mittarfissaanut aningaasaliissutit amerlineqariartut suliariumannittussarsioqqittoqareersorlu kiisami iluatsippoq.
Kalaallit Airportimit tusagassiuutinut nalunaarummi taama allapput.
Canadamiut sanaartortartut Pennecon, Canadap kangisissortaani St. Johnimi qitiusumik allattoqarfeqarput.
Aningaasaliissutit amerlanerungaartut
Mittarfiliornissap piviusunngortinnissaa anguniarlugu aningaasaliissutit qaavatigut 462 millionit koruuninik ilaneqarput. Aningaasaliissutigineqaqqaartut 570 millionit koruuniusut ikippallaartut, naalakkersuisut siorna paasivaat.
2020-mi 2021-milu suliariumannittussarsiortoqarpoq, taakkunaili marlunni isumaqatigiissuteqartoqarnani.
AAMMA ATUARUK Naalakkersuisut Kalaallit Airports milliardit sisamararterutaannik aningaasaliiffigigaat
- Sanaartornerup aallartilluarnissaa qilanaaraarput. Pennecon sumiiffinni pisunit peqqarniitsumik allanngorarsinnaasunillu soorlu nunatsinnitut ittuni sanaartornermik suliassat annertuut piffissami sivisuumi misilittagaqarfigai, Kalaallit Airportimi pisortaaneq, Jens Lauridsen tusagassiuutinut nalunaarummi allappoq.
Mittarfissaq, angalasussat utaqqisarfiat mittarfiup tungaanut aqqusinissaq biilillu unittarfissaat upernaaru sanaartorlugit aallartinneqassapput.
Penneconip suliarinninnissaanut qanoq amerlatigisunik aningaasaliisoqarsimanersoq KNR-imiit Kalaallit Airportimut paasiniaraluarparput, tamanna pillugu suliffeqarfik oqaaseqarusunngilaq.
Borgmesteri qilanaartoq
Mittarfik 1.500 meterisut takisigisoq 30 meterinillu silitsigisoq sananiarlugu qaqqaq 2 millioni kubikmeterisut annertutigisoq qaartiterneqassaaq.
Kommune Kujallermi borgmesterip, Stine Egedep (IA-meersup) nutaarsiassaq nuannaajallaatigeqaa.
AAMMA ATUARUK Kalaallit Airportsip taamaatitsineq uggoraa: Naalakkersuisut apeqqutaalerput
- Ukiut 30-it utaqqereerluta, sivisuumik angalasariaqartarluta, pingaartumik napparsimasut, innarluutillit, utoqqaallu pisarioqisumik angalasariaqartareersut, inuussutissarsiortut takornariallu pitsaanngitsumik atugaqareersut, ukiut pingasut qaangiuppata 2025-mi ukiakkut piffissamik aningaasanillu atulussinnaaffiunngitsumik Qaqortumiit Qaqortumullu angalasinnaalernissarput qilanaaraarput, Stine Egede tusagassiuutinut nalunaarummi allappoq.
Mittarfissap 2025-imi ukiakkut naamamssineqarnissaa naatsorsuutigineqarpoq.
