Naalakkersuisoqatigiilersussat: Tussiarfissuaq immaqa nalliuttuujunnaassaaq
Danmarkip BNP-mik 2 procentii illersornissamut sillimaniarnermullu 2030-mi aallartittumik aningaasaliissutigisalerniarpai. Nunap tamakkerluni ukiumut naammassisai BNP-mik taaneqartarput, nunalu qanoq aningaasarsiortigisimanersoq, BNP-ata ersersittarpaa.
Ministeriunerugallartoq, Mette Frederiksen (S), Socialdemokratit, Venstrekkut Moderatillu naalakkersuisoqatigilernissaannut tunngaviusussat pillugit tusagassiortunut Marienborgip saavani sassarnermini ilaatigut taama oqarpoq.
Danmarkip BNP-ata 2 procentii koruuninngorlugit 4,5 milliardit missiliorluinnarpaat. Aningaasallu taakku tussiarfissuarmik nalliuttuujunnarsitsinikkut pissarsiariniarpaat.
AAMMA ATUARUK Mette Frederiksenip Venstret Moderaatillu naalakkersuisooqatigilerai
- Danskit nalliuttut ilaannik atorunnaarsitsinermikkut isumannaatsuunissatsinnik patajaalllisaaqataassapput, naalakkersuisoqatigiilersussat tunngavissaanni nalliuttut ilaannik atorunnaarsitsinissamik ilaatigut imalimmi erserpoq.
Tussiarfissuarlu nalliuttuujunnaarsissagunavikkitsik, Mette Frederiksen ilisimatitsivoq.
EU-mi illersornissamut tunngasuni oqartussaaqataasimalertoq
Socialdemokratit, Venstre, SF, De Radikale aamma De Konservative nuna tamakkerlugu isumaqatigiissummik, tassa Det Nationale Kompromisimik taallugu marsimi politikkikkut isumaqatigiissusiorput.
Rusland Ukrainemik tiguaariitsiartoq taamaaliorput, Danmarkillu illersornissamut sillimaniarnermullu aningaasaliissutigisartagaasa 2033-utinnagu BNP-ip 2 procentianut qaffakkiartuaartinnissaat taamaaliornermikkut qulakkeerpaat.
AAMMA ATUARUK Løkke: Takorluukkat piviusunngoraangamik nuannertuaannarpoq
Danmarkip EU-mi illersornissamut tunngasuni oqartussaaqataalernissaa pillugu innuttaasut juunip aallaqqaataani taasitinneqarmata amerlanerussuteqartut akuersissutigaat, tamannalu nutaanik periarfissaqalertitsisoq naalakkersuisoqatigiilersussat tunngavissaanni allaqqavoq.
- Naalakkersuisoqatigiilersussat illersornissamut isumaqatigiissutisssami ilaatigut sakkutuujusussaatitaaneq annertusarniarpaat taavalu angutit arnallu naligiissitaanerulernissaat aamma qulakkeerniarlugu.
-Inuiaqatigiit qarasaasiatigut attaveqaataannik isumannaallisaanermik ilisimatusarneq nukittorsassavarput illersoqarnissaqarfillu mingutsitsinngitsunik atortoqarnerulersinniarparput, naalakkersuisoqatigiilersussat tunngavissaanni allaqqavoq.
