Nalunaaqutaq tallimanut tusagassiortunik katersortitsineq, Sisimiunilu tuniluukunnaariartorneq

Naalakkersuisut coronamut killiffik pillugu ualeru nalunaaqutaq tallimanut tusagassiortunut katersortitsissapput.

Nunatsinni untritillit sinnerlugit weekendimi tuniluuttoqarmat aatsaat taamak tuniluuttoqartigaaq. Massakkullu nuna tamakkerlugu ataasinngornermi tunillatsissimasut 103-pput.

Sapaatit akunnerit ataaseq affarlu illoqarfiit anginersaata tulliani, nunatsinni tunillaassuuffiunerpaasumi Sisimiuni tuniluuttoqareersorlu tuniluuttoqarunnaariartorpasittoq, nakorsaaneq Henrik L. Hansen oqarpoq. 

Massakkoqqissaarlu Qeqqata Kommuniani tunillanneqarsimasut nun.gl. malillugu 74-pput.  

Tuniluunneq illoqarfikkaartumik nittartakkami saqqummiunneqanngilaq – kommuninili taamaallaat. Sisimiut avataani tuniluuttoqarnersoq nalunaarutigineqanngilaq.

Tuniluunnerujussuaq

Weekendimi arfininngornermiit sapaatip tungaanut tunillanneqarsimasut arfiniliinaapput. 

- Inuit misissortittut amerlangaatsiarmata, misissuinerit inerneri tuniluunnerup annikilliartorneratut isigisinnaavagut, nakorsaaneq oqarpoq. 

Aggustip pingajuani massakkut tuniluuttoq aallartimmalli, misissortittut 3.052-ni 3.448-nik amerlatigisunik misissuisoqarpoq. Taamaattumillu innuttaasut 54 procentii misissortissimallutik.

Taakkunani 74-t covid-19-mik tunillanneqarsimapput. Misissorneqartuni 2,4 procentii tunillanneqarsimallutik. Misissorneqarsimasut amerlassusaat eqqarsaatigissagaanni amerlassusaat annertuvoq, Nunatta nakorsaaneqarfia naliliivoq.

AAMMA ATUARUK Sisimiuni meeqqat ataasinngorpat atualissasut

Sisimiuni tunillanneqarsimasut kisitsisaat suli qaffasippoq. Sisimiuni sapaatit akunnerata siuliani tunillanneqarsimasut 53-iupput, tamanna innuttaasut 100.000-iuppata tunillanneqarsimasut 943-jussasut assersuuneqarsinnaavoq.

Nunatta nakorsaaneqarfia isumaqarpoq tamanna qaffasippallaarujussuartoq.

- Misissortinnissamut kajumissuseq annertusimavoq, kisiannili suli illoqarfimmi suminngaanneerfiinik ilisimaneqanngitsumik tuniluuttoqarpoq. Tunillatsissimasut, suminngaanneerfiinik ilisimanngisagut nassaarisagut suli amerliartorput. Taamaattumik inuit tamarmik qanillinaveersaarnissaat katerittunullu ornigunnaveersaarnissaat, aammalu assamminnik eqqiluisaartitsilluarnissaat inassutigaarput, Henrik L. Hansen oqarpoq.

Nuummi suliffeqarfimmi tuniluuttoqartoq

Nuummi tunillanneqarsimasut kigaatsumik amerliartorput. Illoqarfiit anginersaanni massakkoqqissaaq tunillanneqarsimasut 17-iupput, sisamanngormat arfiniliinaasut. 

Weekendimi suliffeqarfiit ilaanni najugaqartoq tunillanneqarsimavoq. Inuk taanna ersiuteqarnermigut misissorneqarpoq, suminngaaniilli tunillanneqarsimasoq ilisimaneqanngilaq. 

Tassani suliffeqarfimmiittut amerlanerit akiuussuserneqarnerat naammassereerpoq, tuniluusinnaaneranullu killeqartoq, Nunatsinni nakorsaaneqarfik naliliivoq. 

- Taamaattumik Nuummi tuniluuttoqarnerata annertusinissaa ilimanaateqaqqilerpoq.

AAMMA ATUARUK For mange smittede: Slut med salg af alkohol i Sisimiut

Sisimiuni inuit festinnginnissaat efterfestinnginissaallu, marlunngormat tusagassiortunik katersortitsisoqarmat, peqqinnissamut naalakkersuisup, Kirsten Fenckerp annertuumik inassutigaa. Tamaanimi tuniluuttoqangaatsiarmat.

Taamaasinerani imigassanik tuniniaanermik inerteqquteqalernissaq kommunimi tassani borgmesterip, Malik Berthelsenip, Naalakkersuisunut qinnutigaa - tamannalu Naalakkersuisunit akuerineqarpoq.

Sisimiuni, Sarfannguini Itillimilu neriniartarfinni, caféni imerniartarfinnilu imigassartalinnik tuniniaaneq ingerlaannaq atuutilersumik matuneqarpoq.

Aalakoornartutalinnik tuniniaanermik inerteqquteqarneq ullumikkut ataasinngornermut atuuppoq.