Nannut ikilingaatsiartut

Nanoqatigiit Canadami Hudsonip Kangerliumarnganiittut aarlerinartumik tammararput.

Canadami naalakkersuisut nalunaarusiaat sapaatip akunnerani kingullermi pisortatigoortumik saqqummiunneqartumi atuarneqarsinnaasoq, Reuters allappoq.

Nannnummi Hudsonip kangerliumarngata kippasinnerusortaaniittut ukiut tallimat ingerlaneranni 27 procentinik ikileriarsimapput.

Nannut immami sikusartumi uumasuupput tamannalu pinngitsoorsinnaanngilaat. Maanna issittoq nunarsuup sinneranut sanilliullugu sisamariaammik sukkatigisumik kiatsikkiartorpoq.

AAMMA ATUARUK Temperaturerne i Arktis stiger mere end forventet

Immap sikua Hudsonip kangerliumangarniittoq upernaakkut siusukkut aattalerpoq, ukiakkullu kingusissukkut sikusalerluni, taamaalillutillu nannut sivisuumik nerisaqassanatik.

Hudsonip kangerliumargani immap sikuata annikilliartornera nannut ikiliartornerannut toqqaannartumik attuumassuteqarnersoq erseqqissumik oqaatigineqarsinnaanersoq qulakkkeerneqanngikkaluartoq taamaaassorineqarpoq.

Silap pissussaata allanngoriartornera pissutaalluni puisit ikilisimanerat ilisimatuut oqaatigaat, tamannalu nannut Hudsonip kangerliumarnersuaniittut ikilisimanerannut pissutaasinnaalluni.

Ikiliartupallattut

Uumasoqatigiit ikiliartornerannut aamma takussutissaqarpoq.

Taakkua saniatigut nannut ikiliartupallannerat takuneqarsinaavoq, tassami 2011-p 2016-illu ingerlaneranni nannnut 11 procentinik ikileriarsimapput.

Nannut Hudsonip kangerliumarngata kippasissortaaniittut 2021-mi 618-iusut missiliorneqarput. Taamaammat taakku 1980-ikkunnit 50 procentit missaannik ikilisimapput.

Ilisimatusartut nannut sumiiffimmi tassaniittut siulliullutik nungoqqaarnissaat ernumassutigaat.