Nasat isarussallu paarilluarlugit: Sakkortuumik anorlissalluni apeqqilerpoq
Nuummi najugaqaruit aputeqartorujussuusorigukkulu – taava ilumoorputit. Illoqarfiit pingaarnersaanni pingasunngornermi sisamanngornermilu 1 meterit missaannik apivoq.
DMI-p oqarnera naapertorlugu pingasunngornermi 64 centimeterimik apivoq, ippassarlu 20 centimeterimik apilluni.
Sulilu apeqqissasoq, DMI-p Nuummi silasiorfiani silasiortoq, Mille Brandt Pedersen oqarpoq.
- Unnuguutinnagu 10-mit 20 centimeterimik apisinnaavoq. Sila Nuummiit avannamut Qeqertarsuup Tunua tikillugu taamaassaaq.
Persingaatsiassasoq
Anori suffarimmiit anorsarittut sakkoortussuseqarpoq natsimanertut sakkortutigisumik anoraasuartarluni. Unnulluarnerani unnuarulu qatsungassaaq – sunali tamarmi qaqortuinnanngoqqissaq. Nuummimi anori sakkortusissaq skundimut 30 meterinik sukkassusilimmik anoraasuasartumik. Tassa anorersuartu sakkortutigisumik.
AAMMA ATUARUK Aputeqangaatsiarneranik aamma illit ilungersorpit? Nuummi 64 centimeterimik ippassaq apivoq
- 5-mit 10 centimeterimit annerusumik apissagunarpoq. Annertuallaanngilaq, kisianni persingaatsiarnissaanik isumaqarpoq, Mille Brandt Pedersen oqarpoq.
Assi: Christine Hyldal/KNR
Nuummi aputeqangaatsiarnera pissutigalugu illoqarfiit pingaarnersaanni aputaajaasut qaangiuttoorlutik sulinerannik kinguneqarpoq. Anorlingaatsiarnera aputeqangaatsiarneralu pissutigalugit aqquserngit matuneqarput, tamannalu pingasunngornermi sisamanngornermilu aqqusinertigut angallannermut ajornartorsiortitsingaatsiarpoq. Taamaammat Kommuneqarfik Sermersuup pisariaqanngitsumik angallattoqannginnissaa ippassaq kaammattuutigaa.
Air Greenland taamaatitsisoq
Timmisartukkut angallanneq perserneranik, anorersuarneranik anorsarinneranillu aamma eqqugaavoq.
Air Greenlandip ilaasussat 192-it angalanissaat piffissami matumani taamaatereerpai. Taakku Maniitsumut, Upernavimmut, Nuummut nunattalu kujataanut angalasussaagaluarput.
- Timmisartumut ilaasussat tamarmik allamik ilaaffissalerneqassapput. Kisianni angalanissamut nutaamik pilersaarummik pissarsisimanngikkaanni atuisunut sullissivik attavigineqassaaq, Air Greenlandimi attaveqaqatigiinnermut suliaqartoq, Sasha Kleist Sethsen oqarpoq.
