Nunap immikkoortuani nakorsaaneq: Sianeqattaartorpassuit pinasuartumik sianerniartunut akornutaapput
Iluliarmiut coronamut misissortinniartut 200-riarlutik, 300-riarlutik – ilaallu 400-riarlutik sianertarput. Taakku napparsimmaviup silataani qulinik issittumi, 150 meterit missaannik takissuseqartumik siuleriiaattuni akunnerit marluk utaqqisarput.
Lena Ravn Davidsenip inuit sisamaagaangata ataatsip coronamik tunillatsittoqarfiusartumi tassa Ilulissani pissutsit KNR-imut taama oqaluttuarai.
Taassuma sooq pitsaanerusumik misissuisarfeqannginnera isumasisinnaanngilaa. Ilulissanimi napparsimmavimmi taamaallaat misissuisoqarsinnaavoq. Piffissamillu inniminneeqqaartigani takkutiinnartoqarsinnaanngilaq: Piffissamimmi nalunaaquttap qulingiluat marlullu akornanni inniminneeqqaartoqassaaq.
- Pakatsinartorujussuuvoq, Lena Ravn Davidsen oqarpoq.
Inuit nammineq pisuusut
Ilulissani oqarasuaammut 943211-mut ulluinnarni nalunaaqutaq ullaakkut qulingiluanit marluk tungaanut sianissaatit.
Ilulissanili ornigutiinnarluni misissuisarfimmik oqarasuaatinillu sianerfissanik nutaanik peqalilinngitsoq, nunap immikkoortuani nakorsaaneq, Peter Vedsted oqarpoq.
- Ilulissani maannatut tuniluuttoqartillugu piffissamik inniminneeqqaarani aggiinnarluni misissiortinnissamut periarfissaqanngilaq.
- Misissuisinnaassuserput taamaatsillugu silatusaarnerpaamik atortariaqarparput.
AAMMA ATUARUK Lena Ilulissani coronamut misisissortikkusuppoq: Immaqa 400-riarluta sianerpugut
Taassuma oqarnera naapertorlugu napparsimmaviup eqqaani siuleriiaattorpassuaqarnera inuit namminneq pisuussutigaat.
- Inuit 100-init 120-nut amerlassuseqartut piffissamik inniminneeqqaaratik ullormut takkutiinnartarput. Taakku piffissamik inniminneereersimasunut assersuisarput.
Inuit misissortinnissamut inniminniiniarlutik 200-riarlutik, 300-riarlutik 400-riarlutillu sianerniaqattaartut qanoq isumaqarfigaagit?
- Isumaqarpunga sianernernik tamanik kisissimagamikkit pikkoreqisut. Nersualaagassaappullu, Peter Vedsted oqarpoq.
… Amerlavallaanngillat?
- Ilumut amerlavallaarput. Inuit piffissami ataatsikkut sianerlutik utaqqisuniilertarnerat tassunga pissutaavoq.
Okay. Normunik amerlanerusunik sianerfissaqartitsinikkut allatut aaqqiissuteqarsinnaanngilasi?
- Immaqa taamaaliorsinnaavugut. Taamaalilluta sianertut tamarmik akisinnaassagaluarpagut. Oqarasuaatinik qulinik sianerfissaqartitsilluta allatsinik qulinik akisartoqartitsissanersugut naluara. Maannakkut sulisorisagut Ilulissanut naammattut qularinngilara.
Killilersuutit nutaat
Coronapasimik takutitsisinnaanissamik piumasaqaat unnuap qeqqaniit illoqarfinni nunaqarfinnilu tuniluuffiup aallaaviata ilisimaneqannginneranik ulluni 14-ini kingullerni tunillatsittoqarfiusuni atuutissaaq.
Illoqarfiit nunaqarfiillu aqqi Nakorsaaneqarfiup nittartagaani, nun.gl-imi saqqummersinneqassapput.
Illoqarfik nunaqarfilluunniit allattorsimaffinnut ilanngunneqaruni, taava killilersuutit pingasut atuutilertassapput:
- Coronapasimik takutitsisinissamut piumasaqaat
- Tamanit ornigarneqarsinnaasuni isersimasinnaasut amerlanerpaaffissalernerat - tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.
- Sumiiffinni tamani tamanut iserfigineqarsinnaasuni qanermut assiaquteqarneq.
Sapaatip akunnerani matumani siusinnerusukkut ”piffissami inniminniisarnermut allatut aaqqiissummik ujartuileruttorlusi” oqaatigaat. Tamannalu sapaatip akunnerata tullianit aallartinnissaa naatsorsuutigalugu. Taamaattoqassanngila?
- Inuit uatsinnut ikiuerusukkunik sianeqattaarunnaarlutik aatsaat pisariaqarluinnalernerani sianertartuuppata iluatsilluarsinnaavarput.
Angerlarsimallutit eqqissisimagit
Inuit ataatsimut isigalugu eqqissisimaannassasut, nunap immikkoortuani nakorsaanerup oqaatigaa.
- Inuit pakatsinerat paasisinnaalluarpara. Coronali inunnut amerlanerpaanut nuannertut nuallunnertulluunniit iinnartarpoq. Napparsimmavimmut sianernissaq pisariaqanngilaq. Angerlarsimasoqassaaq. Ullunilu marlunni peqqisseqqasimagaanni mattusimajunnaartoqarsinnaavoq. Napparsimmavimmut sianeqattaarnasi pinasuartumik napparsimasunut ambulancinut sianerniartunut ajornartitsivusi. Angerlarsimallutit eqqissisimanissat pingaaruteqarluinnarpoq.
- Misissuerusuppugut. Tamatumali saniatigut ersiuteqartut tunillatsissimasunillu qanillisaqarsimasut misissorneqarnissaat aamma isumagerusupparput. Tassanilu inuit inuiaqatigiinni pingaaruteqartuni soorlu politiini suliaqartut pingaaruteqarput.
- Inunnik misissortinnerminnik akissutersiniarlutik utaqqisunik illoqarfimmi allaalluni napparsimmavimmi angalaartunik assersuuteqarsinnaavugut. Taakku tunillatsissimallutik akissutersisarput. Taamaammat tuniluuttoqannginnissaanut inuit namminneq akisussaapput, Peter Vedsted oqarpoq.
