Nunarput folketingimi ataatsimiititaliani pingaaruteqartuniilersoq
Nunatsinnit folketingimut qinikkat marluk, tassa Aaja Chemnitz Inuit Ataqatigiinneersoq aamma Aki-Matilda Høegh-Dam Siumumeersoq ataatsimiititaliani ilaasortaaffissinneqarput.
Folketingimut ilaasortat tamarmik Nunanut allanut tunngasunik politikkikkut aalajangiisartuniilissapput. Aaja Chemnitzip ataatsimiititaliami 2023-mi oktobarip pingajuani atuuffigiligassamini aallartinnissani qilanaarutigilluinnarlugu facebookimi quppernermini allappaa.
- Illersornissamut isumannaallisaanermullu tunngasutigut nalorninartorsiorfiup nalaani pingaartuuvoq Ataatsimiititaliamut peqataasarnissaq, taamatullu aamma Illersornissamut Ataatsimiititaliami Inatsisinillu Atuutsitsinermut Ataatsimiititaliami peqataasalissaanga. Taakku ukiuni aggersuni Nunatsinnut pingaaruteqartussaapput, Aaja Chemnitz facebookimi quppernermini allappoq.
Nunanut allanut tunngasunik politikkikkut aalajangiisartuniilissasut
Aki-Matilda Høegh-Dam 2023-mi oktobarimit aamma Nunanut allanut tunngasunik politikkikkut aalajangiisartuniissaaq.
Taanna tusagassiuutinut nalunaarummi allappoq:
AAMMA ATUARUK Aaja Chemnitz: Nunarput iluarisimaarinnissinnaavoq
- Kalaallit Nunaat ukiuni ikingullerni eqqumaffigineqarnerujuartuinnavippoq. Taamaattumik Kalaallit Nunaat pillugu aalajangiinernut peqataatinneqartariaqarpugut. Tamanna inisseriarmat maanna pingaartillugu sulissutigissavara nunatta Inatsisartui suleqatigialugit paasissutissanik eqqortunik isertuuffigineqannginnissaat.
Kalaallit Nunaannut ataatsimiititaliami siulittaasuuginnassasut
Nunanut allanut tunngasunut ataatsimiititaliami nunanut allanut politikkimut sillimaniarnermullu politikkimut tunngassuteqartut tamarmik suliarineqartarput. Tamatuma sanaitigut ataatsimiititaliaq nunanut allanut sillimaniarnermullu politikkimut tunngatillugu danskit naalakkersuisuinut siunnersuisartuuvoq.
AAMMA ATUARUK Aki-Matilda Høegh-Dam: Naalakkersuisut politikkiannut kissaatigut ersarissumik allaqqapput
Nunatsinnit qinikkat tamatuma saniatigut Kalaallit Nunaannut ataatsimiititaliami siulittaasuuffimmik nikittaateqqissapput. Aki-Matilda Høegh-Dam qinigaaffiup ukiuni marlunni siullerni siulittaasuussaaq, Aaja Chemnitzilu ukiut marluk tullianni siulittaasuussalluni.
Aammattaaq Issittumi Inatsisartuni siulittaasutut nikikkumaarput. Aaja Chemnitz ukiuni marlunni siullerni siulittaasuussaaq Aki-Matilda Høegh-Damilu ukiuni tulliuttuni marlunni siulittaasuussalluni.
