Nunasiaanermiit danskit amtiannut: Oqaluttuarisaanermut tunngatillugu Kalaallit Nunaagt pillugu atuakkiaq nersornaaserneqarpoq

"Imperiets børn" aasaq saqqummerami aalassaatigineqaqaaq.

Massakkut Årets Historiske Bog 2021-mik nersornaaseerneqarpoq. Atuakkami Sorsunnersuup Kingulliup kingorna Landsrådip taamanilu danskit naalakkersuisuisa akornanni Kalaallit Nunaat pillugu iliuusit sammineqarput.

Tusagassiortoq atuakkiortorlu Anne Kirstine Hermann neriuppoq nersornaaserneqarnermigut suli sammineqarnerulerumaartoq.

- Atuakkap oqaluttuarisaanerup soqutigineqarnerulerneranik malitseqarnera nuannaarutigaara, oqarpoq.

Nersornaat ukiut tamaasa Dansk Historiske Fællesråd-imit tunniunneqartarpoq, toqqarneqartorlu koruuninik 20.000-inik pissarsisinneqartarluni.

Kalaallisuunngirtinneqassaaq 

Atuakkami "Imperiets Børn"-mi Kalaallit Nunaata nunasiaataanermit Danmarkip ilaatut naqissuserneqarnera 1945-mit 1954-mut pisoq misissorneqarpoq.

Politikkikkut aalajangiiniarnermi pileriartorneq itisilerneqarpoq, tassanilu danskit politikeriisa atorfilittaasalu Kalaallit Nunaat qallunaanngorsarneqassasoq aalajangiisimanerat erserpoq. Tamanna Naalagaaffiit Peqatigiit nunasiaateqarunnaarnermi najoqqutassiaannik uniuineruvoq.  

AAMMA ATUARUK Atuagaq nutaaq nunatta pinngortitaanik ilitsersuut

Anne Kirstine Hermann Nuummi 2009-mi najugaqarluni atuakkiornissaminik isumataarpoq. Tamannalu ukiut qulit sinnerlugit ingerlavoq.

- Inuit atuagaq atuarsimallugu eqqartukkanik ilisarsillutik uannut saaffiginnikulapput. Atuakkami imminut allaffigisutut illunga allappunga, inuimmi oqaluttuarisaanermi pisunik paasisaqarnissaat pingaaruteqaqimmat, atuakkiortoq oqaluttuarpoq.

Anne Kirstine Hermannip atuakkap atuartitsissutitut atorneqarsinnaalernissaa siunissami angorusuppaa.

- Atuakkap kalaallisut oqaatsinut nutserneqarnissaa siullertut soorunami eqqarsaatigaara. Kisianni aamma assersuutigalugu atuakkap imai atuarfinni atuartitsissutitut qanoq atorneqarsinnaaneri isumaliutigaara, Anne Kirstine Hermann oqarpoq.