Nuummi innuttaasunut ataatsimiititsineq: Peqqinnissaqarfiup siunissaanut sunniuteqaqataagit
Nunatsinni innuttaasut ullut arfineq-pingasut tulliuttut ingerlaneranni peqqinnissaqarfiup siunissaanut sunniuteqaqataasinnaapput.
Qinngorput, Atuarfik AHL: oktobarip 25-at nal. 19.00-21.00
Nuuk, katersortarfik: oktobarip 26-at nal. 19.00-21.00
Nuussuaq, Illorput: novembario 2-at nal. 19.00-21.00
Peqqinnissaq pillugu ataatsimiititaliarsuarmi Nuummi innuttaasunut ataatsimiititsinissanut pingasut qaaqqusivoq.
Ataatsimiititaliarsuaq ataatsimiititsinermi innuttaasunut tusarnaarlunilu peqqinnissaqarfik oqaluuserissavaa.
Tamannalu innuttaasut peqqinnissaqarfimmit sunik ikiorneqarnissamut aamma kiffartuunneqarnissamut naatsorsuuteqarsinnaanissaannut siunissami politikkikkut pingaarnersiuinissamut aamma peqqinnissaqarfiup qanoq aaqqissuunneqarnissaanut aalajangiinissamut tunngaviliissaaq.
Ataatsimiititsinerni pingasuni tamani toqqaannartumik oqaluttaasoqassaaq.
Ajornartorsiutit amerliartortut
Peqqinnissaqarfik piffinni tamarmi ilungersuavoq: Aningaasivik imaqanngilaq, peqqinnissaqarifmmilu sulisut amigaatigineqarluinnarput. Tamanna pissutigalugu naammagittaalliutit takkussuupput, partiillu peqqinnissaqarfiup siunissaa pillugu isumaqatigiinngillat.
AAMMA ATUARUK Peqqinnissaq pillugu ataatsimiititaliarsuaq: Nutarsaanissamut sanaartornissamullu 800 millionit koruunit pisariaqartinneqarput
- Politikerit suliuaannartussatut isigivaatigut. Tamannali unitsittariaqarpaat. Taamaaliunngikkunimmi nammakkersorpallaalissvaatigut, suliarittussat suliaritinnissamut utaqqisarnerat sivitsoqqeriaannassaaq kukkuluttortoqalissallunilu, nunatsinni nakorsat peqatigiiffianni siulittaasoq, Hans Christian Florian Sørensen oktobarip 24-ani KNR-imut allappoq.
Maannalu napparsimasut nakorsamut piffissaqalernissaminnut ulluni arlalinni utaqqisariaqartarlutillu utaqqisunik allattorsimaffimmiittut 50-iuinnartariaqaraluartut 400-put.
Partiit peqqinnissaqarfimmut ikiuisoqarnissaanut kissaataat
Atassut: Danmarkip nunatsinni peqqinnissamut oqartussaaffik akisussaafigileqqittariaqarpaa
Demokratiit: Nunanit allamiunit Danmarkimeersuunngitsunik sulisut amerlanerusut
IA: Nunatsinni innuttaasut Danmarkimi peqqissarnissamut napparsimmavinnik toqqagassaqarnissaa, danskit kræftertunut katsorsaariaasianut periarfissaqarnissaa, naalagaaffiullu peqqissartut illuannik Jyllandimi pilersitsinermi akiliinerpaanissaa.
Naleraq: Danmark nunatsinni peqqinnissaqarnermut ikiuissaaq. Partiip oqarnera naapertorlugu Danmarkip peqqinnisaqarfik ingerlalluanngitsoq nunatsinnut 1992-imi tunniuppaa, tamatumalu kingorna ingerlallualersinnissaa periarfissaasimanngilaq.
Siumut: Danskit nunatsinni peqqinnissaqarnermut ikiuinissaannut tunngasoq oqallisiginngilaa.
AAMMA ATUARUK Suaarut: Kalaallit Nunaat 120-nik nakorsassaalatsivoq
Peqqinnissaqarfimmut naammagittaalliutit amerlassusaat ukiut tallimaannaat ingerlaneranni marloriaatingajammik amerlipput.
2022-mi januaarimit septembarimut naammagittaalliutigineqartut 157-iupput. 2017-imut sanilliukkaanni peqqinnissaqarfimmut naammagittaalliutit 86-iinnaapput.
AAMMA ATUARUK Peqqinnissaqarfik pillugu maalaarutit: Ukiut tallimat ingerlaneranni marloriaatinngortut
Sapaatip akunnera qaangiuppat Folketingimut qinersisoqassaaq, peqqinnissaqarfiullu nunatsinni qineqqusaarnermi oqallisigineqarnera annertuvoq.
Peqqinnissaqarfimmi ajornartorsiutit nunatsinnut annertuallaartut Atassut isumaqarpoq.
Taamaammat peqqinnissaqarnerup Danmarkimut utertinneqarnissaa Atassutip siunnersuutigaa.
