Nuummiut pingajussaat akiuussusertinnermut: Ikioqatigiissaagut - pingaaruteqarpoq
Nuummi ippassaq pingajussaanik akiuussusersuineq siullermeerluni ingerlanneqarpoq.
Nunatta nakorsaanera, Henrik L. Hansen, 40-leereersimasunut pingajussaanik akiuussusertittoqarnissaanik kaammattuuteqarpoq.
- Innuttaasut coronamik napparsimarulunnginnissaanik qulakkeerisussaavoq. 40-t sinnerlugit ukioqaraanni taava pingajussaanik akiuussusertinnissaq massakkut pineqartariaqarpoq. Coronammi allannguutaa omikron maanna tuniluutingaatsiarpoq, taanna ippassa KNR-imut taama oqarpoq.
- Juullip nalaani nunatsinnut aamma annguttussaavoq. Tamanna qularutissaanngilluinnarpoq, sukkasuumillu tuniluunnissaa ilimagaara, taanna oqarpoq.
Nunatta nakorsaanerata kaammattuutaa Nuummi innuttaasunit Inussiviup saani siuleriiaat akornannit tusaalluarneqarpoq.
Else Marie Svenningsen:
- Soorunalimi ilaa corona navianaqaaq, taamatut oqaannaraani. Aamma inuiaqatigiittut imminut ikiorserniasarivunga imminullu illersorlunga aamma nunaqqatikka. Soorunalimi upperigakku maanngarpunga pingajussaa kapitippunga upperigakku, aamma pisariaqarpoq, inuiaqatigiit ikioqatigiittussaavugut.
- Soorunami qasunartorujussuuvoq, qatsunnarsinikuullunilu, sugaanni corona, sugaanni makikkaanni corona innassaagut corona. Uffaluunniit kaagiliortaleraanni coronamik atilimmik. Kisianni soorunami qatsunnarsivoq kisianni allatut ajornaqaaq uagut allatuulli malinnaasariaqarpugut, taanna illaatigaluni oqarpoq.
AAMMA ATUARUK Sakkortusaataasumik kapitissinnissaq imaluunniit? Qaqortormiut sissiukkamiittut tamanna qularutiginngilaat
- Soorunami tamakku kaammattorusuppakka ilaa, navianaqimmat soorunami aamma inuiaqatigiinni avatangiisertik eqqarsaatigisariaqarpaat, taavalu qanoq navianartiginersoq, aamma inuttut immitsinnut ikioqatigiinnissaq.
Preben Lind Jensen:
- Covid-19-imut tunillatsissagaluaruma akiuussutissaq pitsaanerusoq pigerusullugu akiuussusertippunga. Peqqinnissaqarfimmut tatiginnippunga, taakkulu kaammattuuteqarmata taamaaliorpunga. Maannami ukiukka apeqqutaallutik napparsimarulussutigisinnaavara. Nammineerlunga arlalinnik ajoquteqarpunga, taamaammallu sapinngisamik covid-19-ernissara pinaveersaartussaavara.
Taassuma corona qatsuppaa.
- Danmarkimut USA-mullu angalanissaraluakka taamaatiinnarpakka. Qatanngutiga ukiorpassuarni takusimanngisara USA-mut tikeraartussaaaluarpara – taamaatiinnartariaqarsimavarali.
- Innuttaasut akiuussusertikkusunnginnerat ajunngitsuunngitsoq isumaqarpunga. Immitsinnut tunillaassunnginnissarput akisussaaffigaarput.
Nikolai Steen Christensen:
- Pingajussaanik akiuussusertinnissaq pisariaqarpoq. Maleruagassat soorlu qanermut assiaquteqarnissaq assigisaallu qinngarnarsinnaagaluarput, kisianni aamma taama qinngarnartiginngillat. Assigiinnarpaa skuugut qilersornissaat aamma assiaqusernissaq taama pingaaruteqartigaaq. Ajornartorsiutaanngilaq.
- Akiuussusertinnissaq inuup nammineq aalajangigassaraa – taamaaliornerli ajornartorsiutaavallaanngilaq. Taamaammat allanut oqarusuppunga, akiuussusertipallatariaqartut.
AAMMA ATUARUK Pingajussaanik akiuussusersuineq avannaani aallartereerpoq sinerissamilu tullinnguupput
- Juullip nalaani corona allatut inissisimalissaaq. Danmarkimut juulliliarnissannut misissortittussaavunga. Tamanna naatsorsuutiginikuusimangikkaluarpara. Københavnimiinnissanni inuppassuit katersuussimasut akornanniinnissara pinaveersaarniarpara. Ulluinnarni inuit qanillinaveersaartarpakak. Assakka sprittertarpakka ersiuteqarnersungalu maluginiartarlugu. Sulisukkalu peqqiilliorlutillu napparsimagaangata angerlarsimaannarnissaanik oqarfigisarlugit.
- Nuummi Inussivimmi ullumi nalunaaqutaq 8:30-miit 17:00 tungaanut pingajussaanik akiuussusertissinnaavutit.
- Maniitsup katersortarfiani nalunaaqutaq 9:00-miit 15:00 tungaanut.
- nun.gl-imi paasisaqarnerugit
