Nuummiut ukiortaarsiornissamut: Pisarnermit ikinnerussaagut
Ukiortaaq annertuumik persuarsiutiginagu.
Nakorsaaneq Henrik L. Hansen marlunngormat taamatut inassuteqarpoq.
- Inuit nalinginnaasumik ilagisartakkat ilagalugit saniatigullu sapinngisamik allanik ikinnerpaanik ilaqarlusi nereqatigiinniarisi, taanna KNR-imut oqarpoq.
Corona tuniluutsillugu ukiortaarsiorneq
Ukiup ulluini kingullerni coronavirusi sukkaqisumik tuniluuppoq.
Taamaakkaluartorli amerlanerusunik killilersuuteqartoqanngilaq.
Naalakkersuisulli Nakorsaaneqarfiullu imatut kaammatuuteqarnissaq isumaqatigiissutigaat:
- Najugaqatitit inuillu ulluinnarni ilagisartakkatit kisiisa ilagalugit ukiortaarsioritsi.
Ippassaq Peqqinnissamut Naalakkersuisup Kirsten Fencker-ip (Naleraq) taanna taperserpaa:
- Uanga nakorsaaneq isumaqatigaara. Piffissami matumani inuit amerlavallaat katersuunnissaat inassutiginanngilaq. Inuit katersuunnaveersaarnissaat imminnullu qanillivallaarnaveersaarnissaat kaammattuutigaarput. Nalinginnaasumik inuit ilagisartakkat imaluunniit najugaqatigisat kisimik ilagalugineqarsinnaapput, taanna KNR-imut oqarpoq.
Nipaatsumik ukiortaarsiorneq
Tamatumunnga pissutaasoq soorunami tassaavoq coronap tunillaassuunnerata siammariartuinnarnera – ingammik Nuummi, ullut tulleriit 60-it 70-illu tunillatsissimasut nassaarineqartarmata.
Nuummiut Kalaaliaqqap saavani KNR-ip ippassaq naapitaasa nipaatsumik ukiortaarsiornissamut kajumissaarutit malikkusuppaat.
- Corona pissutigalugu ukioq manna nalorninartoqangaarmat piareersaasinnaarpianngilagut, Niels Olsen oqarpoq.
AAMMA ATUARUK Illoqarfiliartarfissaq nutaaq ukiortaami ammassaaq: Coronamut atatillugu isumaqarpunga assut akisussaassuseqarluta
- Pisarnermit ikinnerussaagut. Corona pissutigalugu aamma juullimi ilaquttagut pulaanngilagut. Assut mianersorpugut.
Johannes Lindenhann-ikkunni aamma annertuumik persuarsiortoqassamaanngilaq.
- Aappara, ernera anaanagalu ukiortaarsioqatigiissaagut. Corona pissutigalugu sissuertorujussuuvugut. Ilaqutariit tamarmiulluta katersuuttaraluarpugut, ilaannilu ikinngutigut ukiortaarsioqatigisarlutigit, taanna oqarpoq.
Pingasuinnaassagunarpugut
Ove Rønning aamma persuarsiornissamut qaaqqusisimanngilaq.
- Ilaquttagut katersussamaaraluaratsigit tamanna unitsiinnassagunarparput. Corona pissutigalugu. Pingasuinnaassagunarpugut. Allat aamma taamaaliorput, tassa taamaattariaqaannarpoq. Soorunami sissueratta ukiup aappassaa katersuunnissaq unammillernartoqarpoq, taanna oqarpoq.
Danmark-imi aamma peqqinnissamut oqartussat sapinngisamik ikinnerpaanik ilaqarluni ukiortaarsiornissaq inassutigaat.
Coronali tuniluutilermat ullup ataatsip ingerlanerani tunillatsittut amerlanerpaat tulleriligaat taqqavani tunillatsissimapput: 21.403 tunillatsissimapput.
