Oline Sisimiuni atualertoqannginnissaanut atsiortitsigaluarpoq - Naja Katinkali 1.B-mi ullumi atualerpoq
Sisimiuni atualernissaq siullermik – sapaatip akunneranik kinguartinneqarpoq.
Taavalu ullumikkut atuartoqassanersoq aamma nalornissutigineqarluni.
Ullaarli atualertoqarpoq: Atualeqqaartuaqqat aasaanerani atuanngiffeqarnerup sivisunerusup aallarteqqinneranni atuariartoqqaarnerminni qaniorneqarpoq. Taamaakkaluartorli atualernerup suli kinguarteqqinneqarnissaanut inuit 167-it atsiorsimagaluarput.
Olie Inuusuttoq Olsen atsiornernik katersuisuuvoq. Taassuma meeqqat illoqarfimmi coronamik tuniluuttoqarfiusumi atuariartortinnissaat akisussaassuseqannginnerusoraa.
AAMMA ATUARUK Sisimiuni meeqqat ataasinngorpat atualissasut
- Covid-19-imik tunillatsissimasorpassuupput. Illoqarfimmi tuniluuttoqarlunilu aqunneqarsinnaanngitsumik inissisimavoq. Sumi tunillatsissimanerminnik ilisimanninngitsunik tunillatsittoqartarpoq, Oline Inuusuttoq Olsen Naja Katinkamut ullumi 1.B-mi atualertumut anaanaasoq oqarpoq.
- Atuarfimmi suli tuniluuttoqarsinnaanera ernumassutigaarput. Atuarfimmut isernissamut tunillatsissimannginnermut uppernarsaateqarnissaq piumasaqaataanngilaq.
Coronapas qanermullu assiaqut
Sisimiuni sumiiffinnut allanut tamanit ornigarneqarsinnaasunut tamanna piumasaqaataavoq. Neriniartarfinnut, imerniartarfinnut, atuakkanik atorniartarfimmut kommunip allanianut allanullu isernissamut tamakkiisumik akiuussuserneqarsimanissaq imaluunnit coronamik tunilaltsissimannginnermut uppernarsaammik sivisunerpaamik akunnernik 48-nik pisoqaassusilimmik peqarnissaq piumasaqaataavoq.
Inuit amerlanerpaamik 20-t ataatsimoorsinnaatitaapput qanermullu assiaquteqarnissaq piumasaqaataalluni.
Atuartut 1. klassiniit 5. klassinut ullumi atuariartorput. 6. klassimiit 10. klassimut atuartut angerlarsimaffimmiit atuartinneqarnerat aqagu aallartinneqassaaq.
Taamaammat Olinemut paniminik Minngortunnguup Atuarfianut 1.B-nut ullaaq atuariaassisumut allamik periarfissaqanngilaq.
Panivit ullumikkut atualernissaa qanoq igiviuk?
- Eqqissisimaniarsarivunga. Taassuma tungaaniit isiginiarsarivara: Meeraavoq atualernissaminullu qilaarnikuulluni. Taassumali ikinngutini takugunigit ornillugit eqitaariartorsinnaanngikkai nassuiaatigingaatsiarpara. Niviarsiaraagami nuannaartoq nalinginnaasumik isumakuluuteqanngitsoq taamaammat ulloq nuannaarfiusussaagaluartoq isumakuluuteqarnaveersaarpunga, Oline Inuusuttoq Olsen oqarpoq.
AAMMA ATUARUK For mange smittede: Slut med salg af alkohol i Sisimiut
Meeqqat atualernissaannut Sisimiuni tunillatsissimasut qanoq ikitsiginissaat kissaatigigaluarpiuk?
- Isumaqarpunga tuniluunnerup qanoq tuniluunnera ilisimaneqartariaqartoq. Atuarfimmut isernissamut tunillatsissimannginnermik uppernarsaateqartoqartariaqaraluarpoq.... Ullumikkut nakorsiassasuuguma tunillatsissimannginnermut uppernarsaateqartussaavunga. Neriniartarfinnukarniarumalu tamakkiisumik kapitissimasariaqarlunga.
Foto: Oline Olsen
Nakorsaanerup Henrik L. Hansenip oqarnera naapertorlugu atuartut imminnut ungasillisimaarunik tunillatsittoqaratarnissaa aarlerinarpallaanngilaq.
- Meeqqalli atuarfiup avataani peqatigiippata, tamatumani tunillaassuuttoqarnissaanut aarlerinartoq atuarfimmisulli issaaq, imaluunnit suli annertunerulluni. Atuarfiup avataani pisunut tunillaassuunnermi misissuinissamut periarfissaqanngilagut, meeqqat sumiissimanersut ilisimassannginnatsigu, Henrik L. Hansen oqarpoq.
Nakorsaaneqarfiup Qeqqata Kommunialu suleqatigiillutik atuartut imminnut qanillinaveersaarnissaannut tuniluuttoqarnissaanillu pinaveersaartitsinissamut malittarisassaliorput.
Malittarisassani pingaarnerit tassaaapput:
- 1.-5.klassit atuarfinni atuartinneqartassapput, 6.-10.klassillu angerlarsimaffimminniit atuartinneqartassallutik. Marlunngorpat 6.-10. klasse angerlarsimaffimminni atuartinneqarnissaannut ilitsersuutit nassiunneqassapput.
- Atuartut holdikkaarlutik atuariartortassapput. Taamaaliornermi atuartut atuartitsiviup iluaniittut ikilisarneqassapput.
- 1.-5. klasse ataasinngorpat 16. august atualissapput.
- 6.-10. klassit marlunngorpat 17. august atualissapput.
- Atuartut nikerartunik atuariartortarfeqarlunilu anitsiartarfeqassapput.
- Atuartut, inimi atuartitsivimmi ullup qeqqasiortassapput, tamatumani neriffiup nalaani atuartunut allanut akulerutinnginnissaq pinaveersaarniarlugu.
- Anitsiarfiit aalajangersimasumik aaqqinneqassapput, taamaalilluni atuartut atuaqatitik kisiisa anitsiaqatigisassallugit.
- Atuartut imminnut qanillinaveersaassapput, assatillu errortukulallugit
- Atuartut nualluummut ersiutillit angerlarsimaannassapput.
