Paavi Canadamiittoq: Atuarfiit angerlarsimaffiutigisimasut ajortuliorfiusarsimapput

Paavi Frans nunap inoqqaavi utoqqatserfigiartorlugit Candamiippoq, ullunilu arfinilinni tamaaniissalluni. 

- Kristumiut ilarpassuisa nunap inoqqaavinut ajortuliortarsimanerat pillugu ajukkullunga isumakkeerfigeqquvunga, paavi Frans ippassaq ataasinngornermi oqalugiarami oqarpoq.

Atuarfiit angerlarsimaffiutigisimasut taakkua 1831-miit 1996-ip tungaanut atuupput. Meeqqallu 150.000-nit ikinnerunngitsut ilaquttaminnit avissaartitaallutik atuarfinnut angerlarsimaffiutigisuliaanneqarput.

Canadamimi nunap inoqqaaviisa kulturiat inerteqqutigalugu taakkua meerartaat nunat killiit kulturiannut naleqqussarniarlugit angerlarsimaffiutigisuni atuartinneqarsimapput.

Iliveqarfimmi nipaatsumik qinnussisoq

Meeqqat taakkua ilarpassui ilaquttaminnit avissaartitaallutillu kaatsitaasarsimapput. Ilaalu aamma timikkut anniartitaallutillu kinguaassiuutitigut atornerlunneqartarsimapput.

- Utoqqatserpunga, 85-inik ukiulik paavi kaassuartakkami issialluni oqarpoq. 

Taanna Canadami nunap immikkoortuani Albertami Maskwacisimut ippassaq ataasinngornermi tikippoq. Naggueqatigiit First Nationsit nunaliussaat sisamat, atuarfik angerlarsimaffiutigisimasoq Ermineskin iliveqarfillu tamaaniipput. 

AAMMA ATUARUK Paavi utoqqatseriartorluni Canadamut tikittoq

Paavi iliveqarfimmi atuarfinni angerlarsimaffiutigisimasuni atuartuusimasut ilisaaffigisimasaanni unilluni nipaatsumik qinnussivoq.

Assi © : Scanpix

Paavi atuarfik angerlarsimaffiutigisimasup Ermineskinip eqqaani iliveqarfimmi qinnussivoq. Assi: Scanpix

- Taamaalioreerami Edmontonip kujataatungaani kilometerit 100 missaanni ungasitsigisumiittumi Maskwacisimukarpoq, nunallu inoqqaavi 15.000-it missaanniittut Albertamilu høvdinngi tamaani katersuupput. Taakku paavi ataqqinaatitut høvdinginngortimmassuk qilaatersortoqarpoq, KNR-ip Danadami ilanngutassiortua Marianne Stenbæk oqarpoq.

Kamaatigalugillu kanngusuutigigai 

Canadami ministeriuneq Justin Trudeau aamma najuuppoq.

- Maniguutingaarlunga tamaanga ilerfiarpunga, paavi oqarpoq. Meeqqani tamarmik ataqqineqarlutillu asaneqartussaapput. Oqaluffiit kristumiullu nunasiaateqarnermut tapersiisimanerat inunnillu nikaginnissimanerat ajuusaarutigeqaara.

- Atuarfiit angerlarsimaffiutigisimasut ajortuliorfiusarsimapput. Pisimasut kamaatigaakka, kanngusuutigaakka aliasuutigalugillu. Qamannga pisumik utoqqatserpunga, paavi oqarpoq.

AAMMA ATUARUK Paavip meeqqat saarnginik nassaartoqarneranut misiginneqatiginninnera naammagineqanngitsoq

Canadami biskoppit ajortuliornerit pillugit siorna septembarimi utoqqatserput, paavilu ippassaq ataasinngornermi aamma utoqqatserluni.

Meeqqat tuusintilikkuutaat katuullit atuarfiini angerlarsimaffiutigisuni taakkunani toqutaasimasorineqarput. Meeqqat 1300-nit ikinnerunngitsut saarngi Canadami atuarfiit angerlarsimaffiutigisimasut taakkua silataanni ilerrini nalunaaqutserneqarsimanngitsuni 2021-mi maajimili assaanerni nassaarineqarput. Ilaatigut tamanna ilagiit katuullit utoqqatsernissamik tamatuma kingorna kimigiiserfineqarujussuarnerannik kinguneqarpoq.

Assi © : Scanpix