Periarfeerunneqartumut anaanaasoq: Nassaarineqarnissaa neriuutigaara
35-nik ukiulik Peerstaat Isaksen Qaqortumeersoq novembarip ulluisa 22-anni kingullermik takuneqarpoq.
Politiit, qatserisartut Issittumilu Sakkutooqarfik ujaasinikuupput. Namminneq kajumissutsiminnik ikiuuttut aamma ujaasinikuupput. Ujaasinerli inerneqanngilaq.
Peerstaat Isaksen anaanamini qatanngutiminilu Narsami juullisiortussaagaluarpoq. Tamanna 35-nik ukiullip, Peerstaap arnaata Judithe Isaksenip oqaluttuaraa.
- Qamuuna annernaqaaq ukiorpaaluit juullisioqatiginikuunagu juullisioqatigileraluaratsigu, Judithe Isaksen Qanoruumut oqarpoq.
Taassuma panini qaammatit sisamat matuma siornali takuaa. Judithe Isaksenillu panimi nassaarineqarnissaa suli neriuutigaa.
- Neriuutigeqaara nassaarineqarnissaa assut, neriuutigaara timinngualuunniit, ajutoorsimagaluarpalluunniit timinnguataluunniit nassaarinissaa kissaatigigaluaqaara.
Peerstaat Isaksen novembarip ulluisa 22-anni Kommune Kujalliup allaffiata silataani aamma unnukut Brugseneeqqap eqqaani kingullermik takuneqarpoq. Qaqortumi politiit taama isumaqarput.
Facebookikkut saqqummiussat eqqunngitsut
Peerstaat Isaksenip ujaarineqarnerata nalaani ajunngitsoq nassaarineqarsimasoq arlaleriarluni inuit attaveqatigiittarfiat facebook aqqutigalugu siammarterisoqartarpoq.
Tamannalu pillugu Qaqortumi politiit pisortarigallagaat, Kunuk Jakobsen Qanoruumut decemberip 16-ianni ima oqarpoq:
- Inuit kajumissaasavarput aamma piumaffigisinnaavarput taamak eqqunngitsunik, nalunngikkunikku eqqunngitsuusoq taamak siaruartereqqunagit. Pissutigalugu Peerstaat ulloq manna tikillugu nassaarineqarnikuungimmat, aamma soorunami ilaqutaqarpoq, nalunngisarineqarluni kammalaateqarlunilu, soorunami aamma taaku eqqarsaatigineqartariaqarput.
AAMMA ATUARUK Qaqortumi politiit Peerstaat Isaksen pillugu: Suli misissuisoqarpoq
Judithe Isaksen aamma taama kissaateqarpoq.
- Nuanneeqaaq taamak paasisaqarnatik oqallittut, anaanaalluni tupannartorujussuuvoq, qamuuna anniallannartorujussuuvoq.
Judithe Isaksen panimi tammarnera pillugu ima oqarpoq:
- Uanga eqqarsaatigisinnaangilara qanoq ilisimasinnaanersoq, eqqarsartalerpunga ilaanikkut immaqa aallarussaavoq, immaqa immamut naakkarpoq, soorlu tamakku.
Peerstaat Isaksen pillugu paasissutissaateqartut, pisumulluunniit atatillugu ilisimasaqartut Kalaallit Nunaanni Politiinut oqarasuaammut 70 14 48-mut sianersinnaavutit.
