Qasigiannguani coronamik tuniluuttoqarnera uippakajaarfiunngitsoq

Qasigiannguani coronavirusi tuniluuppoq. Kommune Qeqertalimi tunillanneqarsimasut 95-ini amerlanersaat Qasigiannguaniipput.

Taamaakkaluartoq innuttaasut eqqissiivillutik pisut Qasigiarmiu, Taja Larsen oqaluttuarpoq.

- Ajunngilagut. Eqqissisilluta tiguarput. Malunnarpoq innuttaasut eqqissisimallutik tigugaat, uippakajaanngilagut, Taja Larsen oqarpoq.

Facebook attaveqatigiinnermut pitsaasoq

Inuit ikinnerpaamik 50-it coronavirusimik Qasigiannguani tunillatsissimasut sapaatit akunnerata siuliani paasineqarpoq. Tamannalu tusagassiutitigut saqqummiunneqartinnagu innuttaasut Facebookikkut paasivaat.

- Qasigiannguarmiut facebookikkut attaveqatigiittarfeqaratta coronavirusi pillugu. Coronartoqalersimasoq nivinngaavikkut facebookikkut nalunaarfigineqarpugut mianersoqquneqarlutalu. Tusagassiutinut anngunneqannginnerani innuttaasut nalunaarfigineqarneri toqqissisimanartorujuuvoq, Taja Larsen oqarpoq.

AAMMA ATUARUK Dagens coronatal: 28 nye smittede

Coronavirusi tuniluuttoq paasineqaqqammertoq Qasigiannguarmiunik tunillatsissimasoqarnersoq misissuineq aallartippoq.

- Uanga isummanni sullilluarneqaqaagut assut. Ingerlaannarlu paasillugu coronarnerluta coronannginnerlutaluunniit, Ngalannguaq Broberg oqarpoq. Nunaqqatigiillu oqartussat maleruaqqusaannik ataqqinnillutik pisut ilanngullugu oqaatigaa.

Nunaqqataasut ilaasa tunillanneqarsimallutik paasigaagaamikkit nunaqqatitik kalerrittaraat Taja Larsen oqarpoq.

- Nunaqqatigiit ataqqinnipput taavalu coronarsimallutik tassunga Qasigiannguani coronavirusimut gruppitsinnut nalunaartarput ammaqatigiillutik pipput. Taamaammat toqqissisimanartarujuuvoq innuttaaqataalluni mianersorfissagut ilisimallugit, Taja Larsen oqarpoq.

Illoqarfimmut killilersuinerit amerlanerusut

Peqqinnissamut naalakkersuisup Kirsten L. Fenckerip Qasigiarmiut ikioqatigiilluarnerat qujamasuutigaa:

- Qujamasuutigaara naammagittarnerat. Taavalu inuiaqatigiittut ikioqatigiittarnerput ilisarnaatigisarput Qasigiannguani aamma ersarimmat. Innuttaasut ikioqatigiipput, pajuttugassat pajuttarlugit. Taamaatut ikioqatigiinnerat tuppallernaqaaq, aamma neriuppunga attatiinnassagaat naammagittarnerallu paasisinnaakutsoorlugu, Kirsten L. Fencker oqarpoq.

Coronavirusili tuniluunnera pakkersimaarniarlugu killilersuutinik sukateriasariaqarlutik ilanngullugu paasissutissiissutigaa.

- Naatsorsuutigissavaat (Qasigiarmiut aaqq.) arlaatigut immikkut killilersuilerumaartugut. Tuniluunnerup annertusinnginnerunissaa anguniagaqarluta killilersuutinik eqqarsaatersuuteqarpugut.

Kirsten L. Fenckerilli killilersuutit qaqugu suullu Naalakkersuisunit Qasigiannguanut atuutsilerniarneqarnersut oqaatigisinnaanngikkallarpaa.

Naalakkersuisulli ulluni aggersuni nalunaaruteqarumaartut naatsorsuutigineqarsinnaasoq, Kirsten L. Fenckerip paasissutissiissutigaa.