Qasigiannguani ikuallanneq: Angut portusuumiit pissittoq maanna nakorsanit sinitsinneqarpoq

Qasigiannguani illut uiguleriinni ikuallattoqarmat, angut ikuallattumiit aniguiniarluni igalaamiit meterit arfinillit missaannik portussusilimmiit pissittariaqarsimasoq aqqunarpoq.

Taanna Danmarkimi napparsimmavissuarmut Rigshospitalimukaanneqassagunartoq, Kalaallit Nunaanni Politiit pigaartuisa pisortaat, Bruno Brix oqarpoq.

- Angut aqqunarsimasoq maanna nakorsanit sinitsinneqarpoq. Taannalu Rigshospitaliliaanneqartussaavoq, naluara apuutereernersoq, tamanna uppernarsarsinnaanngilara, taanna oqarpoq.

AAMMA ATUARUK Illut uiguleriit ilaanni ikuallattoqartoq: Inuk ataaseq ajoqusertoq

Ikuallattoqarnerani pinerluttuliortoqarsimanngilaq.

- Ikuallanneq qulliminngaanniit aallartippoq. Qulleq nunguilluni ikuallappoq, ledningitaa kiserngorulluni. Taanna innaallagisserisumit misissorneqareerpoq, Bruno Brix oqarpoq.

Angutip ajoqusertup saniatigut inuit allat pingasut putsumik najuussuisimasut misissorniarlugit illut uiguleriit taakkua arfineq-marluusuniit napparsimmaviliaanneqarput.

Taakkuli maanna ajunngitsut pigaartup pisortaata oqaatigaa.