Qeqertarsuarmi nioqqutissanik amigaarteqartut: Immuit qallersuutissallu illinnartaraluaqaat

Qeqertarsuarmi sikuungaatsiarpoq imaaliallaannarlu umiarsuaq nerisassanik pajulluni tulassinnaanngilaq. Pisiniarfimmilu nioqqutissat ikitsuaraapput.

Qeqertarsuarmilu innuttaasut ilaannit tamanna naammagiinnarneqarsinnaajunaarpoq.

- Soqanngilaq pisariaqartitatsinnik soqanngivippoq. Taamaallaat iipilit aqitsuinnanngornikut. Sapigaqartuulluni pisariaqartitatsinnik soqanngilaq. Ajorluinnarpoq, Retha Jerimiassen oqarpoq.

Ukiukkut sikuunnginnerani umiarsuaqarsinnaatillugu naatsitanik nillataartunillu Qeqertarsuaq pilersorneqartarpoq. Ukiorli manna Qeqertarsuaq sikuummat umiarsuarmit tikinneqarsinnaanngilaq. Pilersuisumilu nioqqutissanik amigaateqalerneranik kinguneqarpoq.

Nioqqutissanilli amigaateqartarneq sikuuneranit taamaallaat peqquteqanngilaq. Ukiuni arlalinni nioqqutissanik amigaateqartuartartoq, Rosa Marie Lyberth oqarpoq. 

- Nuanninngitsorujussuuvoq ukiuni arlalinni taamannak ingerlajuarnerput. Imaaligaangat manniit allallu atorfissaqartittakkagut ilaa soorlu poorskilernerani tamakku atortakkagut amigaataajuaannarneri. Massakkut mannilikassaagaluarpoq kisianni immuit tamakkua qallersuutissat assigiinngitsut nillataartitsivimmiittartut tamakku amigaatigaagut. Taqqamaniittutuannguillu akisupput, Rosa Marie Lyberth oqarpoq.

Pilersuisoq nioqqutissanik amerlanerusunik tikisitsissamaartoq

Nioqqutissat timmisartukkoortillugit Qeqertarsuarmut aamma assartorneqarsinnaagaangata assartorneqartartut, Pilersuisumi pisortaanerup, Brian Weuge Chemnitzip nassuiaatigaa.

Qulimiguulimmilli tikinneqarsinnaasut suluusalinniit tikikkuminaannerummata tamanna aamma killeqarpoq.

- Ilumoorpoq nioqqutissanik Qeqertarsuarmut upernaaq kingulleq tikisitsiniarnerput ilungersuanarpoq. Tassani nutaamik pisiortortarfissatsinnut nuunniarnerput annerpaamik peqquteqarpoq. Tassalu nioqqutissat tikisittakkatta normui atortakkagut allanngornerat tassani ilungersuanartitsigami, kisianni tamanna iluarsereerpoq taamaammallu nioqqutissat tikisittakkatsinniit aamma amerlanerusut tikisissamaarpagut.

Qeqertarsuarmi ukiuunerani umiarsuarmik tikinneqarsinnaaneq ajormat, nioqqutissat sivisuumik atasinnaasunik pilersorneqartartoq, Pilersuisup aamma ilisimatitsissutigaa.

Danmarkimiit Qeqertarsuarmut nassiussisariartoq

Pilersuisup nioqqutissaatai amigaateqartuartarneranik innuttaasut oqariartuutaat Pilersuisumit paasilluarneqarpoq. Allanngortikkuminaatsorli nassuerutigalugu.

- Ikitsisinnguanilluunniit pisiassaqanngilaq. Illoqarfimmut allamut pigaangama nioqqutissaqanaartaqaara, aali illoqarfiit eqqaralaannguatsinniittut, Rosa Marie Lyberth oqarpoq.

Nioqqutissalli amigaatigineqartarneri pissutigalugu nammineq iliuuseqarlutik amigaatitik nunami allamiit nassiutsinneqartarput.

- Ajorpoq amigaateqaqaaq. Allatut ajornartumik nunanut allanut imaluunniit Danmarkimut ernerput aqqutigalugu pisiniutsittarpugut nassiutsillugillu. Maani pisiassat ajornangaarmata, Retha Jerimiassen oqarpoq.