RAL-ip siku akornutigigaa: Qeqertarsuup Tunuanut suli apuussinnaanngilagut
- Umiarsuami inuttat Sisimiut avannaanit Aasiaat tungaanut siku maannatut itsillugu ingerlaffigisinnaanagu nalilerpaat, umiarsuaatileqatigiiffimmi Royal Arctic Linemi tuniniaanermut pisortaq, Niels Clemensen KNR-mut oqarpoq.
Umiarsuaq, Mary Arctica, Qeqertarsuup Tunuanut pajuttoq, Sisimiunit avannamut sikoqarpallaarnera peqqutigalugu ingerlaqqissinnaannginnami Nuummut maanna utersimalerpoq.
Qeqertarsuup Tunuaniilluni umiarsuup tikissinnaannginnera immaqa paasiuminaassinnaavoq.
Tassami Qeqertarsuup Tunua imartaqangaatsiarpoq. Qulaaniilli assilisat takugaanni, Sisimiunit Aasiaat kujataatungaanut sikuungaatsiartoq ersippoq.
Assi: DMI.
Kingullermik aamma utiinnartoq
Sikut aqqutigineqarsinnaannginnerat aatsaat umiarsuarmik pajuttumik tikinngittoortitsinngillat. Mary Arcticami Aasialiartilluni Sisimiut avannaanit ullut 14-it matuma siornatigut aamma utiinnarpoq.
- Siku nikingaatsiarsimanngilaq, tassa aqqutissaq sikoqannginnerulersimanngilaq. Tamannalu pillugu Qeqertarsuup Tunuanukarsinnaanngilagut, Niels Clemensen oqarpoq.
Pissutsit ima suli ilungersunartigilersimanngillat allaat Issittumi Sakkutooqarfiup umiarsuai sikunik aserorterequllugit umiarsuaatileqatigiiffimmit ikiortiserineqaratik.
AAMMA ATUARUK Mary Arcticap sikoqarpallaaneranik tulassinnaannginnera ilaqutariinnut sapigaqartuutilinnut eqquinerluttoq
RAL-p pilersaarutai malillugit Mary Arctica Qeqertarsuup Tunuanut majulluni ullut 14-it qaangiuppata aatsaat misileeqqissaaq. Pajunngilertornerli maanna sivitsorpoq. Taamaattumik siku akornutaasoq ullut 14-it suli qaangiutinngitsut ingerlaffigineqarsinnaalissappat umiarsuaq pajuttoq Nuummit avannamukajaassaaq.
- Ammaneqalerpat umiarsuaq Nuummi ingelaannaq usilersussavarput avannamullu aallarluta, Niels Clemensen oqarpoq.
Taassuma oqarnera naapertorlugu Mary Arctica sikulimmi angalasinnaavoq sikunilli aserorterisinnaasutut sanaajunngilaq.
