Qeqqata Kommuniani imigassaq ammaqqimmat eqqissisimapput: Matulerisunik piareersimatitsilluaraluarpugut
Qeqqata kommuniani imerniartarfiit ippassaq ammarput, imerniartarfiilli eqqissisimasimapput:
- Ippassaq pingasunngorneq nalinginnaasutut misinnarpoq, inuillu imerniartarfimmut takkuttut nuannaarlutik takkupput aammalu inuppassuunngillat, Maniitsumi hotel Nattoralimmik piginnittoq Hans Andersen KNR-mut oqaluttuarpoq.
Sisimiunilu aamma eqqissisimasimapput:
- Ippassaq Kukkukuumut isertut agguaqatigiissillugu inuit 35-t 40-t missaanniipput, inuimmi 50-t missaat sulisut ilanngullugit imerniartarfimmeeqqusaaapput. Ippassaq isersimasut eqqissisimapput nilliasoqarnanilu nipituumik oqaluttoqanngilaq, inuit nuannaarput qitittarlutillu pipput ataasinnguartoqqissinnaalernertik nuannaarutigerpasippaat, Sisimiuni imerniartarfimmik Kukkukuumik piginnittoq Anders Andersen KNR-mut oqaluttuarpoq.
Qeqqata kommuniani coronap tuniluunnera annikillisinniarlugu imigassat aalakoornartortallit januaarip aqqarnganiit sapaatit akunneri marluk martoqqatinneqariarlutik sapaatit akunneranik ataatsimik sivitsorneqarput.
AAMMA ATUARUK Sisimiuni imerniartarfiutilik: Matusigallarneq paasisinnaanngivippara
Qeqqata kommuniani imigassap ammarnissaanut ulloq sioqqullugu imerniartarfiutillit naatsorsuutigisimagaluarpaat isaasoqangaatsiassasoq:
- Naatsorsuutigisarput allaanerugaluarpoq tassami inuit feriepengesipput inuppassuillu takkussuutissasorigaluarpagut matulerisugullu piareersartilluaraluarlutigit, isumarput uniuuppoq tassami susoqarpianngiivippoq, Anders Andersen oqarpoq.
- Naatsorsuutigigaluarparput isertut pisarnermit amerlanerunissaat. Kaaviiaartitagut eqqarsaatigalugit inuillu amerlassusaat eqqarsaatigalugit ulloq nalinginnaalluinnartumik ingerlavoq, Hans Andersen oqarpoq.
Sapaatip akunnerisa naaneri imigassaarniarfiunngitsut
Kommuneqarfik Sermersuumi, Kommune Kujallermi Kommune Qeqertalimmilu suli imigassarnianngikkallassapput. Imigassartoqanngikkallarnissaq sisamanngorpat atuutikkunnaassaaq.
Kommunit pineqartut namminneerlutik imigassaarniartoqanngikkallarnissaanik kissaateqartuupput - Naalakkersuisunillu akuerineqarpoq. Akisarsisoqaqaqqammermat, sulinngiffeqarnermi aningaasarsisoqarmat utoqqalinersiutisisoqarmallu Kalaallit Nunaanni politiit imigassaarniatoqanngikkallarnissaanik qinnuteqarnermut tapersiipput. Politiillu napparsimmaveqarfinni politiinilu coronamik tunillanneqarsimasut amerlaneranni ulaperujussuarnissartik annilaangassutigaat.
AAMMA ATUARUK Politiet i Qeqqata Kommunia står parate til genåbning af alkoholsalget
Imigassat matoqqanerani politiit suliassakinnerusut, politimesteri Bjørn Tegner Bay sisamanngormat tusagassiortunik katersortitsinermi oqarpoq.
- Pisarnermit ulapputeqannginneroqaagut, politimesteri Bjørn Tegner Bay oqarpoq.
- Suliat assigiinngitsut sapaatip akunnerata naanerani 207-iupput. Ukiup siulianit sanilliullugit suliatta amerlassusaasa affaaraat. Angerlasimaffinni eqqissiviilliornerit nuna tamakkerlugu quliupput. Imigassamillu aalakoornartulimmik imigassartorfiusunut attuumassuteqartut suliagut ikinnerujussuupput, tamannalu coronamik unammilligaqarnitsinnut suliassatta ikinnerunerat oqilisaataasorujussuupput.
