Siniffimmik ikuallatsitseriarluni qimaasoq: Arnaq ukiuni tallimani pineqaatissinneqarsimasunut inissiisarfimmiissasoq

Arnaq 25-nik ukiulik ikuallatsitseriarsimasutut toqutseriarsimasutullu ukiuni tallimani pineqaatissinneqarsimasunut inissiisarfimmiittussanngortinneqarpoq.

Eqqartuussut Nunatsinni Eqqartuussisuuneqarfiup ataasinngornermi aalajangiiffigaa.

Kalaallit Nunaanni Politiit tusagassiuutinut nalunaarummi taama allapput.

AAMMA ATUARUK Tunumi toqutsisoqarnera pillugu suliat upalungaarsimasuutitat sulisinneqalerneranik kinguneqartoq

Suliaq Tasiilami 2020-mi aasaanerani pisunut pingasunut tunngassuteqarpoq.

Pisut ilaanni arnap siniffik inunnit marlunnit siniffigineqartoq ikuallappaa.

Arnap ikuallattoq imermik qaminniaraluarpaa, tamannali iluatsinngimmat qimaalluni.

Suliamik sulianngortitseqqittoq

Eqqartuussisoqarfik Sermersuup suliaq 2021-mi aggustip 23-ani siullermik suliaraa.

Arnaq nakuusersimasutut, siorasaarisimasutut ikuallatsitsisutullu eqqartuunneqarpoq, tassanilu toqutseriarsimasutut eqqartuunneqarani inummik ikiortissaqanngitsumik qimatsiinnarsimasutut eqqartuunneqarluni.

AAMMA ATUARUK Kalaallit Nunaanni politiit: Meeqqat atisaqanngitsut assinginik siaruarterinasi

Taamaammat ukiuni pingasuni pineqaatissinneqarsimasunut inissiisarfimmiittussanngortinneqarpoq.

Arnap nakuusersimasutut, siorasaaruteqarsimasutut ikuallatsitsisimasutullu eqqartuussivup eqqartuussutaa tiguaa, toqutseriarsimanermullu pinngitsuutinneqarnissani piumasaralugu.

Unnerluussisussaatitaasullu suliap Eqqartuussisuuneqarfimmut suliassanngorteqqinnissaa aalajangerpaat.

Eqqartuussisuuneqarfiullu pineqaatissiissutip ukiunut tallimanut sivitsorneqarnissaa ataasinngormat aalajangerpaa.

- Eqqartuussiviup nakuusernermi peqqarniitsuliortoqarnera, peqqarniitsumik savik atorlugu siorasaaruteqartoqarsimanera kiisalu ikuallatsitseriartoqarlunilu toqutseriartoqarsimanera pingaartuutippaa, politiit tusagassiuutinut nalunaarummi allapput.