Siumut Støjbergip siunissaanut akuliunnianngitsoq, IA-llu akuersaarneqarsinnaanngitsutut taavaa
Nunanut allanut tunngasunut nunamullu imminermut ministeriusimasoq, Inger Støjberg Folketingimiinnissamut naleqquppa?
Tamanna Støjbergip nunasiniartunik unioqqutitsisumik avissaartitsinera pillugu naalakkersuinermi akisussaasumut eqqartuussivimmit ulluni 60-ini parnaarussassanngortinneqarnerata kingorna apeqquserneqarpoq.
Tamanna Folketingimi Qinigaanerup Misilinneqarnissaanut Ataatsimiititaliaata marlunngornermi danskit nalunaaqutaat naapertorlugu ualikkut aalajangiiffigissavaa. Ataatsimiinnermi naammassineqarpat apeqqut taanna akineqarsinnaassanersoq qularnarluinnarpoq.
Naalakkersuinermi akisussaasumut eqqartuussineq naatsumik:
* Naalakkersuinermi akisussaasumut eqqartuussinerup Inger Støjberg ministeritut akisussaaffimmik inatsimmik unioqqutitsisimasutut nalilerpaa.
* Støjberg taamaalilluni aaqqissuussinermi, aappariit nunasiniartut avissaartinneqarneranni inatsimmik unioqqutitsisutut pisuutinneqarpoq.
* Naalakkersuinermi akisussaasumut eqqartuussivimmi eqqartuussisut 26-upput. Tassanilu politikkikkut qinikkat 13-it eqqartuussiviillu qullersaanni eqqartuussisut 13-it eqqartuussisuullutik.
Paasissutissarsiffik: Ritzau
Ataatsimiititialiammi suliaq Folketingimi tamakkiisumik taasissutigineqartussanngorlugu ingerlateqqissinnaavaa. Ataatsimiititaliallu siulittaasuata oqarnera naapertorlugu taama inerneqarsinnaasoq, nutaarsiassaqartitsivik, Ritzau allappoq.
AAMMA ATUARUK Inger Støjberg: Parnaarussassanngortinneqarnera tupaallaatisorujussuuara
Folketingimi ataatsimoortumik suliamut aalajangiisoqassaguni kalaallit qinikkat aamma soorunami oqaaseqartussaassapput.
Siumumiilli, Aki-Mathilda Høegh-Damip tamanna akulerufferusunngilaa.
- Folketingimeersunit Inatsisartuni naleqquttoqarnersoq pillugu akuliuttoqarnissaa kissaatiginngilarput, uagullu danskini Folketingimiittuni naleqquttoqarnersoq akuliukkusunngilagut,
- Danskit akunnerminni pingaarutilimmik aalajangiisussaammata. Taava uagut aamma aalajangiitikkusunnginnatsigit folketingimiinngaanneersut nunatsinni assingamik pisoqarpat, taava aamma pissusissamisoorsoraarput uagut Siumut folketingimiit nunatsunniit qinigaasutut aalajangeeqataannginnissarput, Aki-Mathilda Høegh-Dam KNR-imut oqarpoq.
Naak nunarput Folketingimi ilaasortaatitaqaraluartoq suliani taamaattuni aalajangiinissaq akisussaaffigisussaasutut isiginngilaa.
- Ingammik taama pingaaruteqartigisumik, soorlu uagut nunatsinni aamma taamannak aalajangiisoqassagaluarpat Inatsisartut ataaseq pillugu taava folketinngiminngaanniit amerlanerussuteqarlutik aalajangiiginnapajussinnannginniassammata. Taava ataqqinninneruvoq. Aki-Mathilda Høegh-Dam oqarpoq.
IA: Qaffasinnerpaamik oqartussaasoqarfimmit pineqaatissinneqartup Folketingimiinnissaa akuersaarneqarsinnaanngilaq
Aki-Matilda Høegh Dam aamma Aaja Chemnitz Larsen Inuit Ataqatigiinneersoq Inger Støjberg naalakkersuinermi akisussaasumut eqqartuussivimmut suliassanngortinneqassanersoq Folketingimi aalajangiisoqalermat tamarmik akuliutinngillat.
Aki-Mathilda Høegh Dam taama ingerlaannarniartoq Inuit Ataqatigiinneersoq Folketingimut ilaasortaq allatut iliuuseqarniarpoq.
Aaja Chemnitz Larsen KNR-imit ataasinngornermi ualikkut apersorneqarnissaminut periarfissaqanngilaq, tassungali taarsiullugu allakkatigut akissuteqarpoq.
- Naalakkersuinermi akisussaasumut eqqartuussivik tamat oqartussaaqataanerannut ilaavoq, tassanngalu aalajangiinerit eqqartuussinerillu ataqqissavagut.
- Taamaattumik qaffasinnerpaamik oqartussaasoqarfimmit eqqartuunneqarsimasup Folketingimi issianissaa akuersaarneqarsinnaanngilluinnartutut isigaara. Folketingimi taasisoqalerpat Danmarkimiinnerlu nunatsinniinnerlungaluunniit apeqqutaassaaq, Aaja Chemnitz Larsen oqarpoq.
Folketingimi amerlanerussuteqartut Støjberg naleqqutinngitsutut nalunaarutigissagunikkut taassuma qinigaaffini annaassavaa.
Tamanna oqaluttuarisaanermi qaqutigoortuuvoq. Tamanna Folketingimi ilaasortat taama inissisimaleratarsinnaasut amerlanertigut tunuartarnerannik ilaatigut pissuteqarpoq.
Inger Støjberg maanna attaviitsuusoq Folketingimut piffissami kingusinnerusukkut ilaasortanngorsinnaanera mattunneqanngilaq.
