Sulisitsisut: Aatsaat taamak akiliisinnaajunnaartoqarnissaanut qanitsigaagut

Massakkut barit neriniartarfiillu ulikkaarlutik ammasinnaanngoqqipput, killilersuutit sisamnngormat atorrunnaarneriniit. Qanermut assiaqutit aamma iginneqarsinnaapput kommuninilu pingasuni imigassaq ammarneqaqqippoq.

Ilaatigut Ilulissani nuannaarutigineqarpoq, tassanimi neriniartarfiutilik bariutilillu Heidi Jensen tamakkiisumik ammaqqinnissamut qilanaarpoq.

AAMMA ATUARUK Restaurant og bar-ejer er glad: Nu kan hun igen få fuldt hus på Naleraq

Sulisitsisut aamma nuannaarutigaat killilersuutit unitsinneqarmata.

- Ajunngivippoq, aamma ittuujuillisaarlunga oqarsinnaavunga kiisami. Massakkut inuiaqatigiini pisoqarpassuaqarnissaa ilimagineqarsinnaavoq, Sulisitsisuni pisortaq Christian Keldsen oqarpoq.

Allamut saaqqajaanani ingerlaneq killilersuutitaqanngitsumik ikiorsissutitaqanngitsumillu 

Kisianni Naalakkersuisut isornartorsiorneqarnissamut aniguinngillat. Ilulissani bariutilik Heidi Jensen ilaatigut pingasunngormat oqaluttuarpoq ukioq pilersaarusioruminaassimasoq killilersuutit ilimasaarutigineqaqaqqarnatik takussinnaammata.   

Christian Keldsenip neriuutigaa siunissami Naalakkersuisut coronamik aqutsinerti taamaaattut ingerlatissanngikkaat. Pingaartumik aasap tungaanut inuit sulinngiffeqarnissaminnik pilersaarusiorfianni.

Nunap ilarujussuani Omikron-imik allanngorneq suli tuniluuppoq, kisianni nakorsaaneqarfiup nalilerpaa tuniluunneq Nuummi, Ilulissani aamma Aasianni annikilliartortoq. Naalakkersuisut naapertorlugit killilersuutit pisariaqarsimapput politiit peqqinnissaqarfillu sulisumi akornanni napparsimasoqarnera pissutigalugu malinnaanissaminnut anersaartorfissaqarniassammata. 

AAMMA ATUARUK Pele Brobergip Sulisitsisut isornartorsiuinerat nassuerutigigaa: Ikiorsiissutit siusinnerusukkut piareersinnaagaluarput

Sulisitsisut tamanna paasilluarpaat, kisianni inuussutissarsiornermut artornaqaaq tassanngaannaq matoqquneqarunik ilutigalugulu ikiorsiissutinik pisinnaanatik.  

Assersuut kingulleq tassaavoq barit neriniartarfiillu novembarimi amerlanerpaamik 20-nik isersimasoqarsinnaammata. Naalakkersuisunit ikiorsiissutissaat aatsaat qaammatit pingasut qaangiummata takkupput.  

- Allamut saaqattaartoqassanngilaq, uippallerluta tassaanngaannaq killilersuutiliussanngilagut, Christian Keldsen oqarpoq nangillunilu:

- Aatsaat taamak akiliisinnaajunnaartoqarnissaanut qanitsigaagut coronaqarnerata nalaani. Piffissami kingullermi killilersuutit tamatumunnga peqqutaapput, ingasappallaaramik. Pingaartumik hotelinut, neriniartarfinnut aamma takornariaqarnermut. 

2020-mi suliffeqarfiit ataatsimik sulisullit ikinnerupput

Kisianni Christian Keldsen pisortat killilersuinermik ikiorsiissutinillu ingerlatsinerisa toqqaannartumik  kingunerisaannik akiliisinnaajunnaarsimasunik ilisimasaqanngilaq. Kisianni suliffeqarfeqarpoq kiffartuussinernik taamaatitsisimasunik, soorlu takornariartitsisartut angalanermnik aalajangersimasunik neqerooruteqarsinnaanngikkallartut, Sulisitsisut pisortaat oqarpoq.

Kalaallit Nunaanni inuussutissarsiutip naatsorsoqqissaarneqarnera qiviaraanni kisitsisit taamaallaat 2020-miit kingumut takuneqarsinnaapput.  

Naatsorsueqqissaarnerit takutippaat 2020-mi suliffeqarfiit ukiumut siulianut naleqqqiullugu 300-nik ikileriarsimasut.  

Tamatta nalunngisatsditut corona 2020-mi takkuppoq nunarsuarmullu tamarmut siaruaalluni. Aamma Kalaallit Nunaannut.

Kisianni suliffeqarfiit ikilinerisa coronamik peqquteqarsinnaanerannik allassimasoqanngilaq.

Kisitsisit itisileraanni suliffeqarfiit ataatsimik sulisullit 2020-mi 282-inik ukiumut siulianut naleqqiullugit  ikinnerupput. 2019-imi suliffeqarfiit ataatsimik sulisullit 3006-iupput, 2020-mi ikileriarlutik 2.724-nut. Suliffeqarfiit ataatsimik sulisulli tassaagajunnerupput aalisartut.  

Taakkunannga 50-t aalisartuupput. Aamma suliffeqarfiit ataatsimik sulisullit atortussanik pisiniarfiuteqartut aamma annertuukkuutaarlugit nioqqutillit 50-inik ikileriarput. Tassaasinnaapput pisiniarfeerannguannit pisiniarfinnut annerusunut.  

Suliffeqarfiit ataatsimik sulisullit angallassinermik assartugassanillu suliaqartut 30-nik ikileriarput, Tassaasinnaapput takornarianik nassuiaassisartut imalluunniit takornariartitsiviit.

Taavalu suliffeqarfiit namminersorfiusut ataatsimik sulisullit 35-nik ikileriarput. Tassaasinnaapput siunnersortit, nutserisut ilaallu ilanngullugit.