Tunillatsissimasut ikiliartoqqilersut

Nunatsinni tunillatsissimasut sapaatip akunnerata naanerani 103-oriarlutik maanna ikiartoqqilaalerput.

Tunillatsissimasut ullumikkut 98-iupput.

• Sisimiuni coronamik tuniluuttoqarfiusumi tunillatsissimasut 73-iusut, nun.gl-imi allassimavoq. Taakku sapaatip akunnera naaneranit ataatsimik ikinneruinnarput. 
• Nuummi tunillatsissimasut suli 17-iupput.
• Kommune Kujallermi tunillatsissimasut allanngunngillat: Tassa pingasut. 
• Avannaata Kommunianili Kommune Qeqertalimmilu tunillatsissimasut ikiliartupiloorput.
• Nunatta Avannaani coronamik tunillatsissimasoqanngiinnarpoq.
• Kommune Qeqertalimmilu tunillatsissimasut qulingiluaannaapput. Taakku sapaatip akunnerata siuliani Aasianni tuniluuttoqarnerani 27-ugaluarput.

Sisimiuni tuniluunneq pinngitsoortinniarlugu erngunnerit nangikkiarnerillu pinaveersaarneqarnissaat, Peqqinnissamut naalakkersuisup, Kirsten Fenckerip (N) sukannersumik inerteqqutigaa.

Tamatuma kingunerisaanik kommunip borgmesteria, Malik Berthelsen (S) imigassamik nioqquteqarnerup inerteqqutigineqalernissaanut Naalakkersuisunut qinnuteqarpoq - inerteqquteqalernerlu sisamanngormat erngertumik atuutilersinneqarpoq.

AAMMA ATUARUK Kalaalllit Nunaani coronamik tunillatsittut aatsaat taama amerlatigisut

Tamanna pissutigalugu Sisimiuni, Itillimi Sarfannguanilu niuertarfinni, neriniartarfinni, caféni imerniartarfinnilu imigassamik nioqquteqarneq erngertumik unitsinneqarpoq.

Imigassamik nioqquteqaqqusaannginneq ullumikkut ilanngullugu atuutsinneqarpoq.

Naalakkersuisut coronamut killiffik pillugu nalunaaqutaq tallimanut tusagassiortunik katersortitsissapput.

Nakorsaanerup, Henrik L. Hansenip oqarnera naapertorlugu isumalluarnermik neriuutissaqarpoq:

- Inuit misissortittut amerlangaatsiarmata, misissuinerit inerneri tuniluunnerupannikilliartorneratut isigisinnaavagut, nakorsaaneq oqarpoq.