Tusass: Nunatsinniit avammut sianersinnaaleqqipputit

Ippassaq nunatsinniit avammut sianersinnaanngilagut. Tamanna Amerikap Avannaani kabelip kipineranik pissuteqarpoq, tamannalu nunatsinni oqarasuaatikkut avammut sianernissamut matusivoq.

Tamanna maanna aaqqinneqarpoq.

- Teknikerit ulappupput, Amerikap Avannaanut attaveqaat iluarsartuunneqarpoq, Kalaallit Nunaannullu Kalaallit Nunaanniillu attaveqaatit maanna iluarsipput, Tusassimi attaveqaqatigiinnermi pisortaq, Julie Rademacher oqarpoq.

Ajoqutaasoq ippassaq unnukkut nalunaaqutaq qulinngitsiartoq aaqqinneqarpoq.

Imaani kabeli aamma iluarsaanneqartoq

Nuup kujataani imaani kabelip iluarsaanneqarnerata nalaani tamanna pivoq.

Imaatigut kabelimut attaviup Nuup kujataaniittup iluarsartuunneqarnerani taama pisoqarpoq. Tusassip imaatigut kabeli aggustip ulluisa 19-ianili iluarsaatilerpaa. Islandip tungaanut imaatigut kabelikkut attaveqaat pineqarpoq, taanna Islandimut kiisalu Europamut Danmarkimullu attaveqaataavoq.

AAMMA ATUARUK Tusass: Nunarput tamakkerlugu attaveqaatit ajoquteqarput

- Tassa imaappoq attaveqaateqarnissarput Amerika Avannaanut attaveqaammik pisariaqartitsiviuvoq, Julie Rademacher oqarpoq.

- Attaveqaasersuutit tamarmik nunarput Atlantikup imartaani qeqertarujussuarmiinnera pissutigalugu sunnerneqaqqajaanerusinnaavoq.

Attaveqaammik ippassaq kipisoqarnera nunatta iluani sianernissaq periarfissaaginnarpoq.

Danskilli tv-kkut aallakaatitaat attaveqanngillat aamma Tasiilamit Tasiilamullu kiisalu Ittoqqortoormiinut attaviit pitsaanngillaq. Oqarasuaatikkut sianernerit, mobildata angerlarsimaffinnilu internetti kipisoortoqarnerani eqqorneqarput.