Corona pillugu ullumikkut kisitsisit: Tunillatsissimasut nutaat 213-it

Nunatsinni tunillatsissimasut nutaat 213-it tallimanngornermit maannamut paasineqarput.

Nakorsaaneqarfiup nakorsaasa boosterimik akiuussusersuinermik salliussinerat pissutigalugu tunillatsissimasut pillugit kisitsisit nutaat tallimanngormamit saqqummiunneqarsimanngillat.

Nakorsaaneqarfik naapertorlugu tunillatsissimasut nutaat Ilulissani ataaseq, Qasigiannguani pingasut, Aasianni pingasut, Sisimiuni pingasut, Nuummi 197-it, Tasiilami marluk Ittoqqortoormiinilu ataaseq paasineqarput.

Nunatsinni tunillatsissimasut maanna katillugit 307-upput. Tunillatsissimasut pingasut napparsimmavimmi uninngapput.

Tunillatsissimasut Nuummi amerliartuinnartut

Tunillatsissimasut nutaat sisamanngormamit ullormut paasineqartut amerlassusaat:

Tallimanngorneq decembarip 17-iat: Tunillatsissimasut nutaat 25-t.

Arfininngorneq decembarip 18-iat: Tunillatsissimasut nutaat 27-t.

Sapaat decembarip 19-iat: Tunillatsissimasut nutaat 35-t.

Ataasinngorneq decemarip 20-at: Tunillatsissimasut nutaat 56-it.

Marlunngorneq decembarip 21-at: Tunillatsissimasut nutaat 52-it.

Pingasunngorneq decembarip 22-at ullup qeqqata tungaanut: Tunillatsissimasut nutaat 18-it.

AAMMA ATUARUK Nuummiut pingajussaat akiuussusertinnermut: Ikioqatigiissaagut - pingaaruteqarpoq

Nuummi tunillatsissimasut amerliartuinnarput. Nunatsinni sumiiffinni arlalinni tamatigut tamaanaartumik aamma amerliartorput.

Taamaammat qanillisat sapinngisamik killilersimaarneqarnissaat, pingaartumik illoqarfinnit, nunaqarfinnit nunanit allaniillu tikittunut qanillinaveersaarnissaq kaammattuutigineqartoq, Nakorsaaneqarfik nalunaaruteqarpoq.

Danmarkimi tuniluuttoqangaatsiartoq

Nunatsinni tunillatsissimasut amerlassusaat - nunarsuarmi sumiiffiit allat assigalugit - novembarip decembarilli ingerlanerani amerlingaatsiarput.

Danmarkimi coronavirusimik tunillatsittut nutaat 13.286-it ullup ataatsip kingulliup ingerlanerani paasineqarput. Taakku paasineqarsimasunit amerlanerpaanit ikinnerulaaginnarput. Nunarsuarmi tuniluuttoqalernerani ullormut paasineqartut amerlassusaannut tulliulerput. Marlunngornermi paasineqartut 13.558-iusut nalunaarsorneqarsimasunit amerlanerpaagallarput.

Omikron tuniluunnerpaavoq siaruariartorlunilu.

Omikronimik tunillatsissimasumik nunatsinni suli paasisaqartoqanngilaq, nakorsaanerulli, Henrik L. Hansenip oqarnera naapertorlugu piffissaq apeqqutaaginnalerpoq.

AAMMA ATUARUK Siumup misissuisarfiup nalliuttuni matoqqanissaa kamaatigigaa: Matu qiversivillugu ammarneqarpoq

- Omikron Danmarkimi tuniluutingaatsiarpoq, Islandimi tuniluuppoq, ullullu kingulliit ingerlanerani Savalimmiuni aamma sukkasuumik tuniluulluni. Omikron juullikkunni angalasunit aamma tikiunneqassaaq.

- Juullillu nalaani nunatsinnut tikeraartut aamma nassatariumaarpaat. Qularinngilluinnarparput nunatsinni aamma sukkasuumik tuniluutissasoq, Henrik L. Hansen 40-leereersimasut pingajussaannik kapitinnissamut innersuussuteqaatigaluni KNR-imut sapaatiummat oqarpoq.

- Tunillatsissagaluaraanni napparsimarulussutiginianngikkaanni tassa pingajussaa akiuussusertittoqartariaqarpoq, ajoraluartumimmi nunatsinnimi piffissap sivikitsuinnaap iluani tuniluutipiloortussaavoq, Henrik L. Hansen oqarpoq.