Maniitsumi uuliakoortumik piiaaneq piariingajalersoq

Maniitsumi uuliakoortumik saliilluni piiaaneq naammassilerpoq.

Dieselimik uuliakoornerup suminngaanneerneranik siullermik ilisimaneqanngeqqaaraluartumik  immamiittumik qatserisartut piiaallutik sulipput.

Uuliakoorneq nunap iluani tankimiit aallaaveqartoq Qeqqata Kommuniani upalungaarsimanermi pisortap Ole Kreutzmannip pasitsaassaa maanna uppernasineqarpasippoq.

- Suli tamakkisumik uppernasivinngilarput, kisianni tanki sivisuumik ammasimasoq nassaaraarput. Tassaniittumik piiaarsinnaasatsinnik milluaaneq aallartipparput, Maniitsumi qatserisartuni aqutsisoq Qillaq Jørgensen oqarpoq.

AAMMA ATUARUK Maniitsumi uuliakoorneq tankimit nunap iluaneersumeerunarpoq

Taassuma aamma oqaatigaa tanki umiarsualivimmi aalisakkanik tunisassiorfissuup tunuaniittoq.

Qatserisartut uuliakoortumik piiaanerat maanna piareeriartuaarpoq. Uulia tankimeersoq piiarneqarsinnaasoq tamakkerpat tanki matuneqassaaq. Uuliallu sinnera umiarsualivimmiittoq aamma piiarneqassalluni.  

- Milluaalluni piiaaneq naammasseqqaassavarput. Uulia immamiittoq suli katersorlugu piiassavarput. Atuarfiullu eqqaaniittoq katersugassaq annertujunnaarpoq, Qillaq Jørgensen oqarpoq.

Tipi pissutigalugu atuarfik matusoq

Uuliakoornerup tikkata sakkortunerujussua pissutigalugu Maniitsumi Atuarfik Kilaaseeqqami atuartut sapaatip-akunnerata siuliani angerlartinneqarput.  

Tassami atuafik umiarsualivimmut ungasinngitsumi inissisimavoq.

AAMMA ATUARUK Maniitsumi atuartut dieselimik aniatitsisoqarneranit tipi pissutigalugu angerlartinneqartut

Tikkatali sakkortunera ullualuit qaangiunneranni annikillisimasoq Qillaq Jørgensen aamma oqarpoq.

- Ulloq siulleq tikka assut sakkortuvoq, ullormi taanna silageqaaq seqinerlu kissarluni. Kisianni maanna tikka millivoq tassami uulia piiarlugu assorooqaluta ulapputigigatsigu, taanna KNR-imut sapaatip-akunnerata siuliani oqarpoq.

10. klassertut misilitsinnissaat aamma kinguartinneqarpoq, Atuarfik Kilaaseeqqamili atuartut ullumi atuariartoqqinnissaat pilersaarutaavoq.