Ombudsmandi: Kommunip pisortami isiminik suliaritinnera akilersinnaatitaanngilaa

Illoqarfiit pingaarnersaanni pisortaanerusimasup, Lars Møller-Sørensenip kommunip sulisumi isaanik suliarinninnermut akiliinissaanik atsiunnginnermini nammineq isi immaqa misissorteqqaarsimassagaluarpai.

Kommunimmi sulisumi suliaritinneranik akiliuteqarnissamut pisinnaatinneqarnera inatsisini sumiluunniit allassimanngilaq. Inatsisartut Ombudsmandiata tamanna oqaaseqaammini naqissuserpaa.

Ombudsmandip immikkut ittumik siunnersuisa, Henrik Back KNR-imut oqarpoq.

- Kommunip aningaasartuummik matumanik akiliinissaanut inatsisitigut tunngavissaqanngilaq. Tamanna inummut ataatsimut sallinngortitsineruvoq.

AAMMA ATUARUK Sermersuup inatsit unioqqutippaa: Aqutsisup suliaritinnera akileramiuk

Kommuneqarfik Sermersuumi atortussalersuinermi pisortaq, Gerth Jacobsen pineqarpoq, taassuma isiminik suliaritinnera 22.000 koruuneqartoq akileraartartunit akilerneqarpoq.

Kommunili akiliinissamut inatsisitigut tunngavissaqanngitsoq, Ombudsmandip oqaaseqaatigisamini erseqqissaatigaa.

- Kommunip sulisumi isimigut suliaritinneranut aningaasartuutinik akiliisimanera aningaasartuuteqarnertut kommunip pisortani sulisitsisutut inissisimanini kommuninilluunniit piginnaatitsineq tunngavigalugu pisussaaffigisaatut isigineqarsinnaanngitsoq.

Pisortatut atuunnera suliaritinneranut akiliuteqarnissamut pisinnaatitaaffiliinngitsoq

Danskit tusagassiorfiat, Den Uafhængige, suliaq pillugu 2022-mi upernaakkut saqqummiusseqqaartuuvoq. Tamanna kommunip pappiaraataanik takunnissinnaaneq tunngavigalugu pivoq.

Tamannalu pissutigalugu Ombudsmandip pisoq misissuiffigaa, Kommuneqarfik Sermersuullu suliamut tunngavilersuutini aasaq tunniuppaa.

Tunngavilersuuteqarnermi kommunip Gerth Jacobsen coronamik nunarsuaq tamakkerlugu tuniluuttoqarneranik qitiusumik atuuffeqarmat, taassuma piffissami sivisunerusumi napparsimasutut nalunaarsimanissaa pinngitsoortinniarneqarpoq.

Kommunip tamanna tassanerpiaq kisimi pisimasoq, tamannalu kommunimi sulisunut allanut atuutinngitsoq paasissutissiissutigaa.

- Naliliisoqarpoq sulisup taamatut pingaaruteqartumik inissisimasup pissutsit ajorteruttorneranni napparsimalluni sivisuumik sulinngittariaqarnera atorfimminilluunniit soraartariaqarnera Corona akiorniarlugu suliniuteqarnermut ajortorujussuussasoq, Kommuneqarfik Sermersooq ombudsmandimut nassuiaateqarnermini allappoq.

Assigiinngisitsisoqanngitsoq

Tunngavilersuuteqarnerli taanna naammanngitsoq, Ombudsmandip nalilerpaa.

Ajunngitsorsianimmi sulisunut tamanut atuukkaluarpat inerteqqutaanavianngikkaluarpoq.

Kisianni inatsisit, kommunimi pisinnaatitsissut imaluunniit atortulersuinermut pisortap isumaqatigiissutaa sulisunut ataasiakkaanut aningaasartuutinik akiliuteqarnissamut pisinnaatitsinngillat.

Aamma isinik suliaritinnermut – aamma naak sulisoq corona pillugu suliaqarnermi pingaaruteqaraluarpat pingaaruteqanngikkaluarpalluunniit, ombudsmandi oqarpoq.

- Akissarsiatigut isumaqatigiissutit isumaqatigiissutillu allat misissorpagut. Isileritinnermillu akiliunneqarneq taakkununnga ilaanngitsoq inerniliilluta, Henrik Bach oqarpoq.

AAMMA ATUARUK Isornartorsiuineq: Kommunimi qullersaqarfimmi sulisut akiliunneqarlutik feeriartarsimapput

Gerth Jacobsenip suliaritinnini nammineq akilerniarsimagaluarlugu Den Uafhængigemut oqaatiginikuuaa, pisortaanerusimasulli, Lars Møller-Sørensenip kommunip akiligassaq akilissagaa neqeroorutigisimavaa.

- Tamanna tunngavigalugu isumaqarpunga kommunip sulisumi isimigut suliaritinneranut aningaasartuutinik akiliisimanera isorisarisariaqartuusoq, ombudsmandip oqaaseqaatini naggaserpaa.

Ombudsmandip Kommuneqarfik Sermersuup aningaasanik atuineranik isornartorsiuinerisa qaammatip ataatsip ingerlanerinnaani aappassaraa.

Suliap aappaani kommunip qullersaqarfiani sulisut pisinnaatitaanngitsut akeqanngitsumik angalanissamik tunineqartarsimanerat pillugu kommuni isornartorsiorneqarpoq.